अखेर अवैध वाळू उत्खनन प्रकरणी उपविभागीय अधिकाऱ्यासह तहसीलदार निलंबित.. – विभागीय आयुक्तांच्या अहवालावर ठरले होते अधिकाऱ्यांचे भवितव्य..

नागपूर :-भंडारा जिल्ह्याच्या तुमसर व मोहाडी तालुक्यात शासकीय रेती डेपोवर नियमांना बाजूला सारून आपलाच मनमानी कारभार चालवला जात आहे व परिसरात अवैध रेती तस्करी जोमाने सुरू असूनही अनेकांचे साटेलोटे उदयास आले असल्याचे नुकतेच पार पडलेल्या अर्थसंकल्पीय अधिवेशनात स्थानिक आमदारांनी मुद्दा उचलून धरल्याने महसूल मंत्री चंद्रशेखर बावनकुळे यांनी विभागीय आयुक्त कार्यालयामार्फत सखोल चौकशी करण्याचे आदेश दिले होते.त्यानुसार तुमसर व मोहाडी तालुक्यातील शासकीय रेती डेपोंची मार्च २०२५ मध्ये नुकतीच चौकशी करण्यात आली होती.अर्थसंकल्पीय अधिवेशनात महसूल विभागातील वरिष्ठ अधिकारी व एका सेवानिवृत्त महसूल अधिकाऱ्याचे नाव आल्याने एकच खळबळ उडाली होती.महसूल मंत्र्यांनी आपल्या उत्तरात तुमसर व मोहाडी तालुक्यातील शासकीय रेती डेपोची चौकशी विभागीय आयुक्त कार्यालयामार्फत करण्याची घोषणा केली होती. त्यानुसार नागपूर महसूल विभागीय आयुक्त कार्यालयातील अधिकाऱ्यांनी मोका चौकशी करून संपूर्ण माहिती नुकतीच जाणून घेतली होती.सदरचे अधिकारी विभागीय आयुक्त नागपूर यांना अहवाल सादर करणार होते व त्यानंतर विभागीय आयुक्त सदर अहवाल हा राज्याच्या आयुक्तांना सादर करणार होते. त्यातच विभागीय आयुक्तांच्या अहवालावरच साटेलोटे असणाऱ्या अधिकाऱ्यांचे भवितव्य ठरणार होते. अशातच नागपूरच्या विभागीय महसूल आयुक्तांनी केलेल्या चौकशीत भंडारा जिल्ह्याच्या तुमसरचे उपविभागीय अधिकारी दर्शन निकाळजे व तहसीलदार मोहन टिकले हे दोघेही अधिकारी भ्रष्टाचारात सहभागी असल्याचा ठपका ठेवण्यात आला.त्यानुसार राज्याचे महसूलमंत्री चंद्रशेखर बावनकुळे यांनी आज,बुधवारी ९ एप्रिल रोजी तुमसरचे उपविभागीय अधिकारी दर्शन निकाळजे व तहसीलदार मोहन टिकले यांना निलंबित केले आहे. महत्वाचे म्हणजे,भंडारा जिल्ह्याच्या तुमसर भागात गौण खनिज प्रकरणी नागपूर महसूल विभागीय आयुक्त कार्यालयातील अधिकाऱ्यांनी मोका चौकशी केली असता,पर्यावरण विभागाची अनुमती नसतांना वाळू घाटांमधून अवैध वाळूचे उत्खनन झाल्याचे आढळून आले.सदरचा प्रकार अतिशय गंभीर स्वरूपाचा असल्याने सर्वंकष चौकशीअंती निलंबनाचा निर्णय घेण्यात आला असल्याची माहिती समोर आली आहे.