२७ वर्षीय तरुण चार वर्षांपासून ऑनलाइन बेटिंगच्या जाळ्यात.. – बेटिंगच्या सवयीमुळे उचलले चोरीचे पाऊल..

नागपूर :-एका हॉटेलमध्ये काम करणाऱ्या कर्मचाऱ्याने ड्रॉवरमधील दीड लाख रुपयांवर डल्ला मारला.मात्र सीसीटीव्हीमुळे त्याच्या या कृत्याचा भंडाफोड झाला व पोलिसांनी त्याच्या मुसक्या आवळल्या.आश्चर्याची बाब म्हणजे संबंधित कर्मचाऱ्याचे अभियांत्रिकीचे शिक्षण झाले असून ऑनलाइन बेटिंगच्या सवयीमुळे त्याने चोरीचे पाऊल उचलले.वाठोडा पोलिस ठाण्याच्या हद्दीत ही घटना घडली.

अजित सुरेश दुबे वय २७ वर्षे,काचीमेट,पॉप्युलर सोसायटी असे आरोपीचे नाव आहे.त्याने फायर इंजिनिअरिंग केले असून तो चार वर्षांपासून ऑनलाइन बेटिंगच्या जाळ्यात अडकला आहे. त्यासाठी त्याने अनेकांकडून घेतले. उधार पैसे कर्जदारांचा तगादा वाढत होता व अखेर त्याने आईवडिलांचे घर विकून ३० लाख रुपयांचे कर्ज फेडले. वाठोडा पोलिस ठाण्याच्या हद्दीतील संघर्षनगर चौकाजवळ ओमेश शाहू वय ४३ वर्षे यांचे रॉयल क्लीप नावाचे हॉटेल आहे. तेथे अजित काम करत होता.१८ सप्टेंबर रोजी शाहू हे लॉकरची चाबी काऊंटरच्या ड्रावरमध्येच विसरले.त्यानंतर अजितने चाबीने लॉकर उघडून त्यातील दीड लाख रुपये लंपास केले.शाहू यांना लॉकरमध्ये पैसे न आढळल्याने त्यांनी कर्मचाऱ्यांना विचारणा केली.मात्र,प्रत्येकानेच काहीच माहिती नसल्याचे सांगितले.त्यांनी सीसीटीव्ही तपासले असता,त्यात अजितने पैसे चोरल्याची बाब स्पष्ट झाली.त्यांनी वाठोडा पोलिस ठाणे गाठून तक्रार केली.पोलिसांनी अजितविरोधात भारतीय न्याय संहितेच्या कलम ३०६ अंतर्गत गुन्हा दाखल केला आहे.अजित अगोदर सदरजवळील एका हॉटेलमध्ये कामाला होता.तेथेदेखील त्याने पाच लाखांचा गैरव्यवहार केला होता.त्याच्यावर कारवाई होऊ नये यासाठी नातेवाइकांनी हॉटेलचे पैसे परत केले होते.