उद्रेक न्युज वृत्त
कोंढाळा(गडचिरोली) :- जागतिक मासिक पाळी स्वच्छता दिनाचे औचित्य साधून आज दिनांक- २८ मे रोजी कोंढाळा ग्रामपंचायतीच्या सभागृहात दुपारी १२:३० वाजेच्या सुमारास सरपंचा अपर्णा राऊत,ग्रामसेविका मेघा राऊत,मुक्तिपथच्या भारती उपाध्याय,सदस्या भूनेश्र्वरी गुरनुले,आशा वर्कर,महिला मान्यवर तसेच गावातील ६० किशोरवयीन मुलींच्या प्रमुख उपस्थितीत जागतिक मासिक पाळी स्वच्छता दिन साजरा करण्यात आला.
गेली चार वर्षांपासून जागतिक मासिक पाळी स्वच्छता दिन ग्रामपंचायत कोंढाळाच्या उच्च शिक्षित सरपंचा अपर्णा नितीन राऊत यांच्या पुढाकाराने साजरा करण्यात येतो.जागतिक मासिक पाळी स्वच्छता दिन साजरा करण्या मागचे मुख्य कारण म्हणजे मासिक पाळीबाबत स्वच्छता राखणे आणि त्यासंबंधीचे गैरसमज दूर करण्याच्या उद्देशाने हा दिवस साजरा केला जातो.सध्याची किशोरवयीन पिढी ही ‘फास्ट फूड’ प्रमाणे जलद गतीने चालणारी आहे.लहान वयात असतांनाच पळून जाण्याचे प्रमाण दिवसेंदिवस वाढतच चालले आहे.मात्र,आजच्या तंत्रज्ञानाच्या युगातही केवळ खेड्यातच नाही तर शहरांमध्ये राहणाऱ्या अनेक महिलांना मासिक पाळीशी संबंधित अनेक महत्त्वाच्या गोष्टींच्या माहितीची जाण नसते. यामुळे अनेक ठिकाणी विटाळ मानून अंधश्रद्धा अजूनही बाळगली जाते.खरं तर वयाच्या १६ किंवा १७ व्या वर्षी मुलींना मासिक पाळी येते.मासिक पाळी आल्यानंतर महिलांच्या शरीरात अनेक बदल होतात. हे बदल होत असताना अनेक महिलांना मानसिक आणि शारीरिक समस्यांना सामोरे जावे लागते. मासिक पाळीच्या वेळी स्वच्छता कशी पाळावी?यासाठी आज जवळपास गावातील ६० महिला आणि किशोरवयीन मुलींना मार्गदर्शन करण्यात आले.तसेच मासिक पाळी आल्यानंतर घ्यावयाची काळजी,पाळी येण्याअगोदर आणि नंतर आपल्या शरीरात होणारे बदल, मानसिकतेत होणारे बदल व आजार याबद्दल माहिती देण्यात आली.
