उद्रेक न्युज वृत्त
कोंढाळा(देसाईगंज) :- देसाईगंज तालुक्याच्या कोंढाळा गावातील इंदिरा आवास नगर(टोली)च्या वार्ड क्रमांक-४ येथे आज सकाळी ७.१५ वाजेच्या दरम्यान नळाच्या पाण्यातून एक ते दीड फूट लांबीचा नारुसदृश्य जंतू आढळून आल्याने ग्रामपंचायत प्रशासनाद्वारे नागरिकांच्या आरोग्याचा प्रश्न ऐरणीवर टांगला जातो आहे.
कोंढाळा ग्रामपंचायत प्रशासनाच्या वतीने संपूर्ण गावामध्ये नळाच्या पिण्याच्या पाण्याचा पुरवठा केला जातो.अशातच बऱ्याच वर्षांपासून पिण्याच्या पाण्यासाठी वाटर फिल्टर मशीन लावण्यात आली आहे.मात्र आज दिनांक- २३ डिसेंबर रोजी सकाळच्या सुमारास वार्ड क्रमांक- ४ येथील रहिवासी चंद्रहास ढोरे यांच्या घरी महिला वर्ग पिण्याचे पाणी भरीत असतांना नारुसदृश्य जंतू आढळून आला आहे.सदर नळाच्या पाण्यातून निघालेला नारुसदृश्य जंतू एक ते दीड फूट लांबीचा असून बारीक सुताच्या आकाराचा आहे.नागरिकांच्या मते,यापूर्वीही अनेकवेळा नारुसदृश्य जंतू पाण्यात आढळून आल्याने याबाबत ग्रामपंचायत प्रशासनास माहिती देण्यात आली आहे.मात्र याकडे कानाडोळा करण्यात येत असल्याने कोंढाळा ग्रामवासीय जनतेचे आरोग्य धोक्यात आले असल्याचे सदर प्रकारावरून दिसून येत आहे.नारुसदृश्य जंतू पाण्यातून निघत असतील तर पाणी साठवणूक विहीर व जलकुंभ यातील नियमित साफसफाई करण्यात येते काय? असा प्रश्न निर्माण झाला आहे.पाणी पुरवठा करणाऱ्या नळ योजनेकडे आरोग्य विभागानेही लक्ष देण्याची गरज आहे.वारंवार पाण्यातून नारू निघणे धोकादायक असून ग्रामपंचायत प्रशासनाने कानाडोळा न करता; याकडे लक्ष देण्याची मागणी गावातील नागरिकांकडून व्यक्त केली जात आहे.
