गोरेवाडा प्राणीसंग्रहालयात आणले जाणार हिमालयीन काळे अस्वल आणि लाल रानकोंबड्या..

नागपूर :-वाघ आणि बिबट्यांची वाढती संख्या लक्षात घेता नागपूरच्या गोरेवाडा वन्यजीव बचाव केंद्राला मोठा दिलासा मिळाला आहे.केंद्रीय प्राणीसंग्रहालय प्राधिकरणाने तब्बल सात वाघ आणि दोन बिबट्यांना देशभरातील तीन वेगवेगळ्या राज्यांमध्ये स्थलांतरित करण्यास परवानगी दिली आहे.यामुळे गोरेवाडा प्राणीसंग्रहालयातील गर्दीने भरलेल्या पिंजऱ्यांना एकप्रकारे दिलासा मिळाला मिळणार आहे.विशेष म्हणजे,या अदलाबदलीचा एक भाग म्हणून हिमालयीन काळे अस्वल आणि लाल रानकोंबडी यांना गोरेवाडा प्राणीसंग्रहालयात आणले जाणार आहे.स्थलांतराचा प्रस्ताव सुमारे दीड वर्षापूर्वी प्रधान मुख्य वनसंरक्षक (वन्यजीव)कार्यालयामार्फत केंद्र सरकारकडे सादर करण्यात आला होता.या प्रस्तावाला अखेर मंजुरी मिळाल्याने,सातपैकी दोन वाघ आता रंगपहाड येथील नागालँड प्राणीसंग्रहालयात,दोन सिरमौर,(हिमाचल प्रदेश)येथील रेणुकाजी मिनी झू मध्ये आणि तीन वाघ व दोन बिबटे रोहतक प्राणी संग्रहालयात(हरियाणा)पाठवले जातील.सिरमौर येथील रेणुकाजी मिनी झू मधून दोन हिमालयीन काळे अस्वल आणि चार लाल रानकोंबड्या बाळासाहेब ठाकरे गोरेवाडा आंतरराष्ट्रीय प्राणीसंग्रहालयात आणल्या जातील.गोरेवाडा बचाव केंद्रात वाघांसाठी १० पिंजरे आणि बिबट्यांसाठी २० पिंजरे आहेत.तथापि,प्रत्यक्षात तिथे २२ वाघ आणि ३४ हून अधिक बिबटे ठेवण्यात आले होते.या गर्दीमुळे वन विभागाला वाघांना बिबट्यांच्या पिंजऱ्यात आणि बिबट्यांना अस्वल व माकडांच्या पिंजऱ्यात ठेवण्याच्या कठीण परिस्थितीला सामोरे जावे लागले.त्यामुळे अदलाबदलीचा निर्णय घेण्यात आला आहे.