व्हॉट्सॲपवरील ‘एपीके’ फाइलने केला घात; दहा लाखाला गंडा..

नागपूर :-एका निवृत्त कर्मचाऱ्याला मोबाईल व्हॉट्सॲपवर पाठवलेली बनावट ‘एपीके’ फाइल उघडणे चांगलेच महागात पडले आहे.फाईल उघडताच सायबर चोरट्यांनी मोबाईल हॅक करून त्यांच्या बँक खात्यातून तब्बल दहा लाख रुपये परस्पर वळती केले.नागपूरच्या अजनी पोलिस ठाण्याच्या हद्दीत राहणारे ६५ वर्षीय निवृत्त कर्मचारी यांचे सीताबर्डी येथील बँक ऑफ महाराष्ट्र बँकेत बचत खाते आहे.नुकतेच १६ जुलैला त्यांच्या व्हॉट्सॲपवर ‘बँक ऑफ महाराष्ट्र पेन्शन कार्ड’ या नावाने एक ‘एपीके’ फाइल पाठवण्यात आली.सदर फाइल बँकेशी निगडित अधिकृत दस्तावेज असल्याचे समजून त्यांनी त्यावर क्लिक केले.फाईल उघडण्यास सुरुवात होताच सायबर चोरट्यांनी त्यांचा मोबाईल हॅक केला.त्यानंतर त्यांच्या खात्यातून पहिल्यांदा पाच लाख रुपये,त्यानंतर तीन लाख रुपये आणि नंतर दोन लाख रुपये,असे एकूण दहा लाख रुपये विविध खात्यांमध्ये वळती केले.खात्यातून रक्कम काढल्याचा मॅसेज येताच वृद्धाला धक्का बसला.त्यांनी तात्काळ अजनी पोलिस ठाण्यात जाऊन तक्रार नोंदवली.त्यावरून पोलिसांनी अज्ञात सायबर चोरट्यांविरोधात गुन्हा नोंदवून तपास सुरू केला आहे.

• नागरिकांना आवाहन👇

अनोळखी व्यक्तींकडून व्हॉट्सॲप,एसएमएस किंवा ई-मेलद्वारे आलेल्या कोणत्याही प्रकारच्या ‘एपीके’ फाइल उघडू नका,अन्यथा आपल्या मेहनतीच्या पैशावर सायबर चोरटे डल्ला मारल्याशिवाय राहणार नाही.त्यामुळे सतर्क राहा,कुठल्याही अमिषाला बळी पडू नका.