मोबाईल बँकिंग ॲप अपडेट करण्याच्या बहाण्याने व्यापाऱ्याला चुना.. – सायबर चोरट्यांनी ९ लाख ९७ हजार उडवले..

नागपूर :-मोबाईल बँकिंग ॲप अपडेट करण्याच्या बहाण्याने सायबर चोरट्यांनी एका धान्य व्यापाऱ्याची तब्बल ९ लाख ९७ हजार ७८० रुपयांची फसवणूक केली.या प्रकरणी नागपूरच्या सायबर पोलिस ठाण्यात गुन्हा दाखल करण्यात आला आहे.कैलाश बद्रीप्रसाद अग्रवाल वय ६४ वर्षे हे नागपूरच्या इतवारी परिसरात ‘गगन ॲग्रो इंडस्ट्री’ या नावाने धान्य खरेदी-विक्रीचा घाऊक व्यवसाय करतात.त्यांच्या इंडसइंड बँकेच्या खात्याशी मोबाईल क्रमांक लिंक असून ते नियमितपणे बँकेच्या अधिकृत मोबाईल बँकिंग ॲपचा वापर करत होते.ते दुकानात असतांना त्यांच्या मोबाईलवर एका अज्ञात क्रमांकावरून फोन आला. मोबाईल स्क्रीनवर ‘इंडसइंड बँकिंग’ असे नाव आणि बँकेचा लोगो होता. समोरच्या व्यक्तीने स्वतःला बँकेचा अधिकारी असल्याचे सांगत,सध्या वापरत असलेले मोबाईल बैंकिंग ॲप कालबाह्य झाले.असून नवीन ॲप डाउनलोड करणे आवश्यक असल्याचे सांगितले. यानंतर अग्रवाल यांच्या व्हॉट्सॲपवर एक एपीके लिंक पाठविण्यात आली.त्यात अधिकृत बँक ॲपची लिंक असल्याचा समज करून कैलाश अग्रवाल यांनी ती डाउनलोड केली आणि ॲपमध्ये खाते क्रमांक आयएफएससी कोड,डेबिट कार्ड क्रमांक,एक्सपायरी डेट,सीव्हीव्ही आणि एटीएम पिन यांसारखी संवेदनशील माहिती भरल्यानंतर काही वेळातच त्यांच्या मोबाईलवर व्यवहारांचे संदेश येण्यास सुरुवात झाली.सायबर चोरट्यांनी त्यांच्या खात्यातून वेगवेगळ्या सहा व्यवहारांद्वारे ९ लाख ९७ हजार ७८० रुपये वळविले.अग्रवाल यांच्या तक्रारीवरून सायबर गुन्हेगारांविरोधात गुन्हा दाखल करण्यात आला आहे.