रेती माफियांच्या सराईत टोळीवर ‘मोक्का’ अंतर्गत कारवाई..

नागपूर :-प्रशासनाने मनात आणले तर गौण खनिजांचा एक टोपलाही कुणी नेऊ शकणार नाही.पण,कोण अंगाला हळद लावून घेणार? असा प्रकार हल्ली सर्वत्र उघडकीस येऊ लागला आहे.अश्यातच नुकतेच नागपूर जिल्ह्याच्या कुही तालुक्यात अवैध मुरूम उत्खनन करणाऱ्यांची मुजोरी उघडकीस आली होती.चक्क नायब तहसीलदाराला जेसीबीला लटकलेल्या अवस्थेत सुमारे तीन ते चार किलोमीटर अंतरापर्यंत फरफटत नेऊन धावती जेसीबी काटेरी झुडपांतून चालवण्यात आली. नायब तहसिलदार यांनी जेसीबीला घट्ट पकडुन ठेवल्याने मोठी दुर्घटना होता- होता थोडक्यात बचावली.या घटनेचे पडसाद राज्याच्या विविध कानाकोपऱ्यात उमटले आणि विविध स्तरातून घटनेचा निषेध नोंदविण्यात आला. दरम्यान,नागपूरचे जिल्हाधिकारी कुमार आशीर्वाद यांनी गौण खनिजांची अवैधरित्या चोरी करणाऱ्यांविरोधात कठोर कारवाईचे निर्देश दिलेले असतांनाच रेतीची अवैध वाहतूक करणाऱ्या रेती माफियांविरुद्ध भिवापूर पोलिसांनी धडक कारवाईचा बडगा उगारला आहे. बनावट रॉयल्टीच्या आधारे शासनाचा कोट्यवधींचा महसूल बुडवून पर्यावरणाची ऐशी-तैशी करणाऱ्या रेती माफियांच्या सराईत टोळी विरुद्ध पोलिसांनी महाराष्ट्र संघटित गुन्हेगारी नियंत्रण अधिनियम(मोक्का)अन्वये गुन्हा नोंदविला आहे.

कारवाईत टोळी प्रमुख मोहम्मद इनाझुल उर्फ कल्लू तजमुल खान वय ४० वर्षे,रा.रोशनबाग,खरबी चौक, नागपूर याच्यासह टोळीतील सदस्य कैसर अली रियाझुद्दीन अली वय ४७ वर्षे,रा.गरीब नवाज चौक खरबी,नागपूर,सुरज दिलीप गभने वय २७ वर्षे,रा. गुडेगाव,जि.भंडारा,दिनेश मधुकर काकडे वय ३२ वर्षे रा.डोंगरगाव,ता.कुही,जि.नागपूर व इतर पाच जणांचा समावेश आहे.विशेष म्हणजे,मोक्काच्या कारवाईत एकूण नऊ जणांचा समावेश असला तरी पोलिसांनी केवळ चारच आरोपींची नावे उघड केली आहेत. उर्वरित पाच आरोपींची नावे अद्याप पोलिसांनी स्पष्ट केलेली नसल्याने रेतीच्या गोरखधंद्यात गुंतलेल्या इतर माफियांची झोप उडाली आहे.हे पाच जण नेमके कोण? याबाबत तर्कवितर्क लढवले जात आहेत.या टोळीने केवळ रेतीची अवैध वाहतूकच केली नाही,तर बनावट कागदपत्रे तयार करून शासनाची आर्थिक फसवणूकही केली. भिवापूर,उमरेड,नागपूर,भंडारा जिल्ह्यात या टोळीवर अनेक गंभीर गुन्ह्याची नोंद आहे.टोळीच्या गुन्हेगारी कारवाया थांबत नसल्याने पोलिसांनी ‘मोक्का’चा प्रस्ताव तयार करीत,विशेष पोलिस महानिरीक्षक,नागपूर परिक्षेत्र यांच्याकडे सादर केला होता.नुकतीच त्यास मंजुरी मिळाली आणि पोलिस अधीक्षक हर्ष पोद्दार,अप्पर पोलिस अधीक्षक अनिल म्हस्के यांच्या मार्गदर्शनाखाली भिवापूर पोलिसांनी ही धडाकेबाज कारवाई केली.

गत २४ एप्रिल २०२६ रोजी स्थानिक गुन्हे शाखेच्या पथकाने भिवापूर परिसरात कारवाई करीत,अवैध रेतीची वाहतूक करणारा टिप्पर क्र.एमएच ४० बीझेड १७१७ आणि त्याला एस्कॉर्ट करणारी क्रेटा कार क्र.एमएच ४९ सीडी ४७७७ ही दोन वाहने रेतीसह जप्त केली होती.याप्रकरणी गुन्हा दाखल केल्यानंतर तपासात आरोपी चक्क बनावट रॉयल्टीचा वापर करून रेतीची वाहतूक करीत असल्याचा धक्कादायक प्रकार उजेडात आला.पोलिसांनी लागलीच कैसर अली आणि कल्लू खान यांना अटक केली.यासंपूर्ण प्रकरणात सुरज गभने व दिनेश काकडे यांचाही सहभाग असल्याचे स्पष्ट झाले.न्यायालयाने दिलेल्या सात दिवसांच्या पोलिस कोठडीत आरोपींकडून पोलिसांच्या हाती संघटित गुन्हेगारीचे धागेदोरे लागले आणि मोठी कारवाई करण्यात आली.