धावत्या कारने अचानक घेतला पेट; सुदैवाने जीवितहानी टळली..

गडचिरोली :-मुलाचा सैनिकी शाळेच्या प्रवेश परीक्षेचा पेपर असल्याने चारचाकी वाहनाने गडचिरोलीसाठी निघालेल्या कुटुंबियांच्या कारने अचानकपणे आरमोरी-गडचिरोली मार्गावर पेट घेतल्याची घटना आज,शनिवार १८ एप्रिल रोजी सकाळच्या सुमारास चुरमुरा गावाजवळ घडली.कारच्या समोरील भागातून धूर निघत असल्याचे मार्गावरील काही मुलांच्या निदर्शनास येताच त्यांनी कारचालक अनिल डोंगरवार रा.देसाईगंज(मूळचे- साकोली,जि.भंडारा)यांना कळवताच त्यांनी तात्काळ कार थांबवून पत्नी आणि मुलाला बाहेर निघण्यास सांगितल्याने मोठा अनर्थ टळला.सुदैवाने जीवितहानी टळली,मात्र कारने अचानकपणे पेट घेऊन रौद्ररूप धारण केल्याने कारचे मोठे नुकसान झाले आहे.सध्या उन्हाळ्याचे दिवस असून दिवसेंदिवस तापमानात वाढ होत आहे.त्यामुळे वाहनाचे इंजिन वा इतर भाग सुसाट वेगामुळे गरम होऊन अचानक पेट घेण्याची शक्यता नाकारता येणार नाही.