सावधान..! प्रधानमंत्री लोन योजनेच्या नावाने बनावट जाहिरातीचा आधार..

उद्रेक न्युज वृत्त :-हल्ली फसवणूक करणाऱ्यांचे नेटवर्क दिवसेंदिवस वाढत चालल्याने नागरिकांनी सतर्क राहणे गरजेचे झाले आहे.कोणत्याही मोठ्या आमिषाला बळी पडण्यापूर्वी माहितीची खातरजमा करणे अत्यंत महत्त्वाचे आहे.सोशल मीडियावर लोकांना जाळ्यात ओढण्यासाठी फसवणूक करणारे कधी काय करतील याची शास्वतीच नाही.आकर्षक ऑफर,कमी कागदपत्रांमध्ये मोठे कर्ज किंवा सरकारी योजनेच्या नावाखाली आर्थिक मदत देण्याचे आमिष दाखवून लोकांची फसवणूक केली जात असल्याच्या घटना उघडकीस आल्या आहेत.अश्यातच आता एका नव्या फसवणुकीसाठी चोरट्यांनी यंत्रणा तयार केल्याचे उघड झाले आहे.ज्यात “प्रधानमंत्री लोन योजना आधारकार्ड पे,तीन लाख रुपये लोन हर किसिको,अभी अप्लाई करे” असे म्हणून केवळ आधार कार्डवर तीन लाख रुपयांपर्यंतचे कर्ज मिळेल,असे सांगितले जात आहे. यासाठी फार कमी कागदपत्रांची गरज असल्याचा दावा केला जातो.त्याच बरोबर लोकांचा विश्वास बसावा, यासाठी जाहिरातीत सरकारी योजनांसारखे दिसणारे ग्राफिक्स, “अप्लाई नाऊ” सारखे शब्द,तसेच क्यूआर कोड आणि लिंक दिल्या जात आहेत.मात्र,सरकारने हा दावा पूर्णपणे खोटा असल्याचे स्पष्ट केले आहे.प्रेस इन्फॉर्मेशन ब्युरो म्हणजेच पीआयबीने(PIB)स्पष्ट केले की,प्रधानमंत्री लोन योजना आधारकार्ड पे,तीन लाख रुपये लोन हर किसिको,अभी अप्लाई करे” अशी कुठलीही लोन स्कीम योजना नसून अशा जाहिरातींवर विश्वास ठेवू नये,असे आवाहन करण्यात आले आहे.

अनेकदा बनावट जाहिरातींमध्ये दिलेल्या लिंकवर क्लिक केल्यास वापरकर्ते बनावट वेबसाइट किंवा ॲपवर पोहोचतात.तेथे आधार क्रमांक,मोबाईल नंबर,बँक खाते,ओटीपी किंवा इतर वैयक्तिक माहिती मागितली जाते.ही माहिती मिळाल्यानंतर फसवणूक करणारे लोक आर्थिक गैरव्यवहार करू शकतात.अशा फसवणुकीपासून वाचण्यासाठी सोशल मीडियावर दिसणाऱ्या संशयास्पद जाहिरातींवर क्लिक करणे टाळावे.कोणतीही योजना खरी आहे की नाही, लहे नेहमी सरकारी पोर्टल किंवा अधिकृत संकेतस्थळावर तपासावे.तसेच अनोळखी वेबसाइट किंवा ॲपवर वैयक्तिक माहिती शेअर करू नये.