सोशल मीडियाच्या स्नॅपचॅटवर ओळख; बोलणे बंद करताच अश्लील फोटो व व्हिडीओ क्लिप केले व्हायरल.. – आरोपी तरुणास बेड्या..

नागपूर :-एका २६ वर्षीय तरुणाची सोशल मीडियाच्या स्नॅपचॅटवर १९ वर्षीय तरुणीशी ओळख झाली.दोघांचेही स्नॅपचॅटवर चॅटिंग सुरू झाले. चॅटिंगदरम्यान तरुण हा आपल्या नातेसंबंधातीलच असल्याची बाब तिला कळली.त्याच्यावर विश्वास ठेवत प्रत्येक गोष्टी शेअर झाल्या.तिच्या स्नॅपचॅटचा आयडीसुद्धा तरुणाला माहीत होता.स्नॅपचॅटच्या माध्यमातूनच दोघांची ओळख अधिक घट्ट झाली.अश्यातच वर्षभरापूर्वी तरुण हा तरुणीला भेटण्यासाठी उमरेड येथे गेला.त्यानंतर,कर्हांडला मार्गावरील एका हॉटेलमध्ये नेत तिला लग्नाचे आमिष दाखवून शारीरिक संबंध ठेवले.दरम्यान,सहा महिन्यांपूर्वी तरुणीने तरुणाबाबत कुटुंबीयांना सांगितले असता कुटुंबीयांनी बोलण्यास नकार दिला.तेव्हापासून तिने बोलणे बंद करताच तो चिडला.रूमवर भेटण्यासाठी ये, असा तगादाही त्याने सुरू केला.तिने भेटण्यास नकार दर्शविल्यानंतर आपल्या दोघांचेही फोटो आणि व्हिडीओ माझ्याकडे असून,ते तुझ्या कुटुंबीयांना,मित्र-मैत्रिणींना दाखवतो.तुझी बदनामी करतो,अशी धमकी तो वारंवार देऊ लागला.दरम्यान,२८ मार्च २०२६ रोजी आरोपी तरुणाने पुन्हा धमकीतंत्राचा वापर करीत उमरेड येथील एका दर्ग्याजवळ तिला भेटण्यासाठी बोलावले.घराकडे परतल्यानंतर काही वेळातच तिच्या नातेवाइकाकडून स्नॅपचॅटवर अश्लील व्हिडीओ आल्याचे सांगितले. काही वेळातच व्हिडीओ डिलीट झाला.त्यानंतर,१३ एप्रिल २०२६ च्या रात्री आठ ते नऊ वाजेदरम्यान पुन्हा पीडितेच्या स्नॅपचॅट आयडीवरून आरोपी आणि तिचे अश्लील व्हिडीओ व्हायरल झाल्याची बाब समोर आली. अखेरीस तरुणीने पोलिसांत तक्रार नोंदविली.याप्रकरणी उमरेड पोलिसांनी पीडितेच्या तक्रारीवरून आरोपीविरुद्ध भारतीय न्याय संहिता(बीएनएस) कलम ६४,माहिती तंत्रज्ञान अधिनियम २००० सहकलम ६६ (ई),६७(अ) अन्वये गुन्हा नोंदवून अटक केली आहे.मोहम्मद जुनैद सादिक शेख वय २६ वर्षे, रा.कोष्टीपुरा शाळेजवळ, भिवापूर,जि.नागपूर असे अटकेतील आरोपीचे नाव आहे.तर पीडित १९ वर्षीय तरुणी उमरेड येथील एका कॉलेजमध्ये शिक्षण घेत आहे.प्रकरणाचा पुढील तपास ठाणेदार धनाजी जळक यांच्या मार्गदर्शनाखाली सुरू आहे.