संगीताचे वर्ग घेणाऱ्या शिक्षकाने केला चिमुकलीचा विनयभंग; आरोपी शिक्षक फरार..

नागपूर :-संगीताचे वर्ग घेणाऱ्या एका ४३ वर्षीय

शिक्षकाने ६ वर्षीय चिमुकलीचा विनयभंग केल्याची संतापजनक घटना कामठी शहरात उघडकीस आली असून या प्रकरणी चिमुकलीच्या आईने पोलीस ठाणे गाठून तक्रार नोंदवताच घटनेनंतर आरोपी शिक्षक फरार झाला आहे.पोलिस त्याच्या मागावर आहेत. स्वप्निल राजाबाबू बन्सोड वय ४३ वर्षे,रा.छत्रपतीनगर, नवीन कामठी,जि.नागपूर असे आरोपी संगीत शिक्षकाचे नाव असून त्याच्यावर पोलिसांनी भारतीय न्यायसंहिता कलम ७५,११५(२),पॉक्सो कलम ८,१२ अन्वये गुन्हा दाखल केला आहे.

स्वप्निल बन्सोड हा मागील काही वर्षांपासून स्वतःच्या घरीच संगीताचे क्लास घेत होता.तो विवाहित असून त्याला दोन मुले आहेत.पीडित चिमुकली त्याच्याकडे संगीत शिकायला जायची.पाच दिवसांपूर्वी ती क्लासला गेली होती.सायंकाळी सहा वाजण्याच्या सुमारास क्लास सुटल्यानंतर सर्व विद्यार्थी आपापल्या घरी निघून गेले. अश्यातच चिमुकली घरी जात असतांनाच,त्याने तिला थांबवले व आपण ‘किसी-किसी’ खेळू,अशी बतावणी करून तिला दुसऱ्या खोलीत नेले.तिथे तिच्याशी अश्लील चाळे केले व सदरचा प्रकार कुणाला सांगू नको,अशी दमदाटीही त्याने विद्यार्थिनीला केली.घाबरलेल्या चिमुकलीने सदरचा प्रकार ११ एप्रिलच्या रात्री साडे आठ वाजण्याच्या सुमारास आईला सांगितला.घडलेला संपूर्ण प्रकार पीडित चिमुकलीकडून कळताच,याबाबत विचारणा करण्यासाठी तिची आई दुसऱ्या दिवशी १२ एप्रिलला स्वप्निलच्या घरी गेली  आणि तिने विचारणा करताच,स्वप्निलने तिला मारहाण करून हाकलून लावले व स्वप्निल घरून पळून गेला.त्यानंतर,आईने चिमुकलीला सोबत घेऊन कामठी(नवीन)पोलिस ठाणे गाठून तक्रार नोंदविली.प्रकरणी पोलिसांनी विविध कलमान्वये गुन्हा दाखल करून आरोपी शिक्षकाचा शोध सुरू केला आहे.