प्रसिद्ध गायिका आशा भोसले काळाच्या पडद्याआड..

मुंबई :-प्रसिद्ध गायिका आशा भोसले यांनी आज, रविवार १२ एप्रिल रोजी मुंबईच्या ब्रीच कँडी रुग्णालयात वयाच्या ९२ व्या वर्षी अखेरचा श्वास घेतला.ज्येष्ठ गायिका आणि पद्मविभूषण पुरस्काराने सन्मानित आशा भोसले यांची तब्येत अचानक बिघडल्याने त्यांना काल शनिवारच्या संध्याकाळी मुंबईतील ब्रीच कँडी रुग्णालयात दाखल करण्यात आले होते.त्यांना छातीचा संसर्ग व हृदयविकाराशी संबंधित त्रास जाणवत असल्याने तातडीने रुग्णालयात हलविण्यात आले होते. त्यांच्यावर अतिदक्षता विभागात तज्ज्ञ डॉक्टरांच्या देखरेखीखाली उपचार सुरू असतांनाच आज दुपारच्या सुमारास त्यांच्या निधनाची बातमी समोर आली.याबाबत आशा भोसले यांचे पुत्र आनंद भोसले यांनी जाहीर केले. उद्या सोमवारच्या सकाळी ११ ते २ या वेळेत त्या लोअर परळ या ठिकाणी त्यांचे पार्थिव अंत्यदर्शनासाठी ठेवण्यात येणार आहे.दुपारी ४ वाजता शिवाजी पार्क या ठिकाणी त्यांच्या पार्थिवावर अंत्यसंस्कार करण्यात येणार आहेत,असे आनंद भोसले यांनी स्पष्ट केले.

आशा भोसले यांचा जन्म ८ सप्टेंबर १९३३ रोजी सांगली येथे झाला.आशा भोसले यांनी वडील दीनानाथ मंगेशकर यांच्या संस्कारातून संगीताचे धडे घेतले.सुरुवातीच्या संघर्षानंतर त्यांनी हिंदी,मराठी, बंगाली,गुजराती,तमिळ, तेलुगू अशा तब्बल वीस पेक्षा अधिक भाषांमध्ये बारा हजारांहून अधिक गाणी रेकॉर्ड करून विक्रम प्रस्थापित केला. “पिया तू अब तो आजा”, “दम मारो दम”, “चुरा लिया है तुमने”, “ये मेरा दिल” यांसारखी गाणी आजही रसिकांच्या ओठांवर आहेत.