आज ३५ वर्षीय तरुणाची धारदार शस्त्राने हत्या; गडचिरोली शहरात खळबळ..

गडचिरोली :-एका ३५ वर्षीय तरुणाची धारदार शस्त्राने हत्या केल्याची घटना आज,सोमवार १६ मार्च रोजी दुपारी साडेचार वाजेच्या सुमारास गडचिरोली शहराच्या लांझेडा वार्डात घडली.सचिन कोल्हुरवार वय ३५ वर्षे, रा.विवेकानंद नगर,गडचिरोली असे हत्या झालेल्या तरुणाचे नाव आहे.तर महेश बुरांडे असे आरोपीचे नाव असून प्राथमिक माहितीनुसार,पैशांच्या देवाण-घेवाणीच्या वादातून सदरची हत्या झाल्याचे स्पष्ट झाले आहे.घटना घडताच आरोपी महेश बुरांडे घटनास्थळावरून फरार झाला.घटनेची माहिती मिळताच गडचिरोली पोलिसांनी तात्काळ घटनास्थळी धाव घेत पंचनामा केला असून मृतदेह उत्तरीय तपासणीसाठी जिल्हा सामान्य रुग्णालयात पाठविण्यात आला आहे.आरोपीच्या शोधासाठी विशेष पथके रवाना करण्यात आली आहेत.

माहितीनुसार,मृतक सचिनने २०१९ मध्ये आरोपी महेश बुरांडे याला सुमारे सव्वा लाख रुपये फर्निचर बनवण्यासाठी दिले होते.मात्र,महेशने फर्निचर तयार करून न देता पैसे परत करण्यासही टाळाटाळ केली. त्यामुळे,नेहमी दोघांमध्ये खटके उडायचे.अश्यातच आज महेशने सचिनला लांझेडा वार्डातील आपल्या घरी,जिथे तो फर्निचर बनवण्याचे काम करतो,तिथे बोलावले होते.सचिन हा आपल्या परिचित दीपक नंदेश्वर याच्यासोबत त्या ठिकाणी गेला.त्यावेळी दोघांमध्ये बाचाबाची झाली. बाचाबाचीदरम्यान आरोपी महेशने घराच्या आतून मिरची पावडर आणून अचानक सचिन आणि प्रत्यक्षदर्शी दीपक नंदेश्वर यांच्या अंगावर फेकली. त्यामुळे दोघे काहीकाळ गोंधळलेल्या अवस्थेत असतांना महेशने संधी साधत फर्निचर बनवण्यासाठी वापरण्यात येणाऱ्या धारदार अवजाराने सचिनवर वार केले.या हल्ल्यात सचिन गंभीर जखमी झाला आणि त्याचा घटनास्थळीच मृत्यू झाला.या घटनेचा प्रत्यक्षदर्शी साक्षीदार दीपक नंदेश्वर असून तो घटनेच्या वेळी सचिनसोबत उपस्थित असल्याचे पोलीस तपासात समोर आले आहे.प्रकरणी गडचिरोली पोलिसांनी आरोपी विरोधात हत्येचा गुन्हा दाखल केला असून पुढील तपास सुरू केला आहे.घटनेने गडचिरोली शहरात एकच खळबळ उडाली असून नागरिकांमध्ये भीतीचे वातावरण पसरले आहे.