झाडाच्या वेलीने गळफास लावून आत्महत्या; कुरखेडा तालुक्यातील घटना..

कुरखेडा(गडचिरोली):-एका ४० वर्षीय इसमाने गावालगत असलेल्या जंगल परिसरात झाडाच्या वेलीने गळफास लावून आत्महत्या केल्याची घटना उघडकीस आल्याने कुटुंबियांवर मोठा आघात झाला आहे.विशेष म्हणजे,ज्या दिवशी घराबाहेर पडला त्या दिवशी कुणालाही वाटले नव्हते की,तो आत्महत्येसारखे एवढे मोठे पाऊल उचलेल.रूपेश नामदेव सहारे वय ४० वर्षे,रा.मौशी(पलगड), ता.कुरखेडा,जि.गडचिरोली असे मृतकाचे नाव असून मृतक रूपेश हा सोमवारच्या सायंकाळी कुणालाही काहीही न सांगता घरून निघून गेला होता.रात्र होऊनही तो घरी परतला नव्हता. गावाशेजारील मोहगांव येथे सांस्कृतिक नाट्य कार्यक्रम असल्याने तो तिथे गेला असावा,असा अंदाज कुटुंबियांनी व्यक्त करून त्याचा शोध घेतला नाही.दरम्यान,रूपेश हा

मंगळवारी जगंलात गुरे चराईला गेलेल्या गुराख्याला एका झाडाच्या फांदीला वेलीने गळफास घेतलेल्या अवस्थेत दिसून आला.त्याने लगेच गावकरी व त्याच्या कुटुंबियांना घटनेची माहिती दिली.गावकऱ्यांनी घटनास्थळी धाव घेत कुरखेडा पोलिसांना माहिती दिली.पोलिसांनी घटनास्थळ गाठत पंचनामा करून शव उत्तरीय तपासणीसाठी कुरखेडा उपजिल्हा रुग्णालय येथे पाठवला.काल बुधवारी शवविच्छेदन करून मृतदेह कुटुंबीयांच्या सुपूर्द करण्यात आला.आत्महत्येचे कारण अद्याप कळू शकले नाही.प्रकरणाचा अधिक तपास कुरखेडा पोलिस प्रशासन करीत आहे.