रस्त्याने जात असलेल्या महिलेचा पाठलाग करून विनयभंग; आरोपीस तीन वर्षांचा सश्रम कारावास..

गोंदिया :-एका महिलेला रस्त्यात गाठून विनयभंग केल्याप्रकरणी गोंदिया जिल्हा सत्र न्यायालयाचे न्यायाधीश आर.एन.जोशी यांनी साक्षीदारांचे जबाब तसेच प्रकरणाची पार्श्वभूमी लक्षात घेऊन आरोपीला भारतीय न्यायसंहिता कलम ७४ अंतर्गत दोन वर्षाचा सश्रम कारावास,तसेच पाच हजार रुपये दंड (दंड न भरल्यास एक महिना अतिरिक्त कारावास),कलम ७५ (२)अंतर्गत एक वर्षाचा सश्रम कारावास व एक हजार रुपये दंड(दंड न भरल्यास एक महिना अतिरिक्त कारावास)असा एकूण तीन वर्षांचा सश्रम कारावास, तसेच सहा हजार रुपये दंडाची २६ नोव्हेंबरला शिक्षा ठोठावली आहे.सडक-अर्जुनी तालुक्यातील डोंगरगाव डेपो येथील ४९ वर्षीय सुभाष उर्फ मड्या श्रीराम मडावी असे शिक्षा ठोठावण्यात आलेल्या आरोपीचे नाव आहे.

मागील वर्षाच्या १९ ऑक्टोंबर २०२४ रोजी ४५ वर्षीय पीडिता डोंगरगाववरून खुर्शीपार येथे पायी जात होती.तितक्यातच आरोपी सुभाष मडावी महिलेच्या मागे लागून तुझे नाव काय आहे,कोणत्या गावची,असे विचारून त्याने तिचा हात पकडून रस्त्याच्या बाजूला असलेल्या झुडुपात ओढत नेले व विनयभंग केला. पिडीतेने ओरड करताच परिसरातील काही नागरिकांनी घटनास्थळी धाव पीडितेला मडावीच्या तावडीतून सोडविले होते.त्यानुसार,पिडीतेने त्याच दिवशी देवरी पोलीस ठाण्यात तक्रार नोंदवली होती.तत्कालीन तपासी अधिकारी पोलिस उपनिरीक्षक गीता मुळे यांनी तपास पूर्ण करून आरोपीविरुद्ध कलम ७४,७५(२),७८(२) अंतर्गत दोषारोपपत्र सादर केले होते.पोलिस अधीक्षक गोरख भामरे यांच्या मार्गदर्शनात,अप्पर पोलिस अधीक्षक अभय डोंगरे यांच्या देखरेखीत हवालदार ब्रिजलाल राऊत यांनी न्यायालयीन कामकाजासाठी सहकार्य केले. प्रकरणी जिल्हा सत्र न्यायालयाने आरोपीस शिक्षा सुनावली.