हत्येचा उलगडा..! अवैध सावकारीच्या वादातून भाजपच्या वॉर्ड अध्यक्षाची हत्या; दोन आरोपी अटकेत..

नागपूर :-दोन दिवसांपूर्वी झालेल्या भाजपचे ४० वर्षीय वॉर्ड अध्यक्ष सचिन शाहू यांची हत्या अवैध सावकारीच्या वादातून झाल्याचे स्पष्ट झाले असून पैशांच्या वादातून आरोपींनी शाहू यांची हत्या केली आहे.प्रकरणी पोलिसांनी आरोपी सोनू गौर आणि त्याचा भाऊ बाबू गौर यांना अटक केली आहे.गौर बंधूंच्या इतर दोन भावांचा आणि सहकाऱ्यांचा पोलिस शोध घेत आहेत. त्यातच, पोलिस प्रशासन गौर बंधूंवर मकोकाअंतर्गत कारवाईचा विचार करत आहेत.गौर बंधूनी त्यांच्या सहकाऱ्यांच्या मदतीने शनिवार १५ नोव्हेंबर रोजी दुपारी वीटभट्टी चौकात सचिन शाहू यांची हत्या केली.कुख्यात गौर बंधू बेकायदेशीर कर्ज देणे,जमीन हडप करणे,खंडणी आणि सट्टेबाजी यासारख्या अनेक गुन्ह्यांमध्ये सहभागी आहेत. गौर बंधूंनी गुन्ह्यांद्वारे कोट्यवधींची संपत्ती गोळा केली आहे.ते सर्वजण ‘गोल्डन मॅन’च्या शैलीत दागिने घालून फिरतात.सचिन यांनी कोरोनादरम्यान गौर बंधूकडून ७० हजार रुपये उधार घेतले होते.पैसे परत केल्यानंतरही गौर बंधूनी व्याजाची मागणी सुरूच ठेवली.त्यामुळे त्यांच्यात वाद निर्माण झाला. गणेशोत्सवादरम्यान गौर बंधूनी सचिन यांना मारहाणही केली.पोलिसांनी केवळ अदखलपात्र गुन्हा दाखल केला होता.यामुळे गौर बंधू संतापले.बदला म्हणून त्यांनी सचिन यांची त्यांच्या मुलाच्या वाढदिवशी हत्या केली.या प्रकारामुळे जनतेत संताप निर्माण झाला.पोलिसांनी आतापर्यंत नागपूरमधून सोनू गौर आणि यवतमाळमधून त्याचा भाऊ बाबू गौर याला अटक केली आहे.अटक करण्यात आलेल्या आरोपीचा फरार भाऊ सीटू हा ट्रान्सपोर्टर बॉबी माकडच्या हत्येतही सहभागी होता व तो सध्या जामिनावर बाहेर आहे.हे विशेष.