तुमच्याकडे किरायाने राहणारा किरायदार गुन्हेगार तर नाही ना..! – पोलीस विभागाला माहिती देणे गरजेचे; गडचिरोली जिल्ह्यात दागिण्यांसाठी झाली होती हत्या..

गडचिरोली जिल्हा मुख्यालयापासून अवघ्या ५ किलोमिटर अंतरावर असलेल्या नवेगाव येथे रविवार १३ एप्रिल २०२५ रोजी गडचिरोली जिल्हा परिषदेतील ६० वर्षीय सेवानिवृत्त महिला अधिकारी कल्पना उंदिरवाडे यांची डोक्यावर लोखंडी रॉडने प्रहार करून हत्या केल्याची घटना दुपारच्या सुमारास उघडकीस आली होती.कल्पना उंदिरवाडे या आपल्या मुलासोबत नवेगाव येथील सुयोगनगर येथे राहत होत्या.त्यांच्यासोबत घरकाम करणाऱ्या शांताबाई अंबादास मुळे वय ६०, रा.नवेगाव यासुद्धा राहत होत्या.उंदिरवाडे यांचे राहते घर दुमजली असून,खाली व वरच्या मजल्यावर तीन कौटुंबिक खोल्या आहेत.सर्वात वरच्या मजल्यावर तीन सिंगल रूम असून,त्याठिकाणी शिक्षण घेणाऱ्या मुली राहत आहेत.सर्वच खोल्या किरायाने दिल्या आहेत. अशातच तीन कौटुंबिक खोल्यांपैकी एका खोलीत आरोपी विशाल ईश्वर वाळके वय ४० वर्षे, रा.ता.एटापल्ली,जि.गडचिरोली,त्याची पत्नी व आई किरायाने होते.अशातच विशाल वाळके याच्यावर कर्ज व हात उसनवारी घेतलेले इतरांचे पैसे देणे होते.त्यामुळे त्याने १३ एप्रिल रोजी कल्पना उंदीरवाडे यांच्या घरी चोरी करण्याचा प्रयत्न केला.चोरी करतांना आरोपी सापडला असता,त्याने कल्पना यांचे डोक्यावर रॉडने प्रहार केला. त्यातच त्यांचा जागीच मृत्यू झाला होता.कल्पना उंदीरवाडे यांचा मृत्यू होताच आरोपी विशाल वाळके याने कल्पना यांच्या अंगावरील तीन दागिने घेऊन पसार झाला होता.यांनतर पोलीस तपास पथकांनी साक्षीदार तसेच इतर पुराव्यांच्या मदतीने संशयीतांची यादी तयार केली. त्यात आरोपी विशाल वाळके हिट लिस्टवर होता. लागलीच संशयाची सुई बळावली अन् तो अलगद जाळ्यात अडकला होता.अश्या घटना घडू नयेत, यासाठी तुमच्याकडे किरायाने राहणाऱ्या व्यक्तीची इत्यंभूत माहिती असणे गरजेचे आहे.