स्कूलबस मागे घेतांना चिमुकल्याला धडकली; ४ वर्षीय चिमुकल्याचा दुर्दैवी मृत्यू..

नागपूर :-स्कूलबस घराजवळ येऊन थांबल्याने मुलीला शाळेत सोडण्यासाठी आई घराबाहेर पडली.तितक्यात ४ वर्षीय चिमुकला आईमागे गेला.आईमागे जात असतांना त्याच्याकडे कुणाचेही लक्ष नव्हते.रोडवर येताच चालकाने स्कूलबस मागे घेतल्याने चिमुकल्याला बसची जोरात धडक बसली.धडकेत गंभीर जखमी झालेल्या चिमुकल्याचा मृत्यू झाल्याची दुर्दैवी घटना कळमेश्वर शहरात काल शुक्रवारी सकाळच्या सुमारास घडली.पार्थ पंकज कांडलकर वय ४ वर्षे,रा.रतन-सावित्री अपार्टमेंट, महाजन लेआउट, नागपूर रिंग रोड,कळमेश्वर असे मृत पावलेल्या चिमुकल्याचे नाव आहे.पार्थचे वडील शिक्षक असून,आई गृहिणी आहे.त्याची थोरली बहीण गार्गी फेटरी नागपूर ग्रामीण तालुक्याच्या सेंट जोसेफ स्कूलमध्ये इयत्ता तिसरीत शिकते.ती एमएच-४० सीटी-४३९० क्रमांकाच्या स्कूलबसने रोज शाळेत ये-जा करते.ही स्कूलबस पार्थच्या घराजवळच थांबते.स्कूलबस काल शुक्रवारी सकाळच्या सुमारास घराजवळ येताच आई गार्गीला बसपर्यंत सोडून देण्यासाठी पडली आणि नकळत तिच्याच मागे पार्थदेखील धावत गेला.चालक स्कूलबस मागे घेत असतांना पार्थला स्कूलबसची जोरात धडक लागल्याने तो गंभीर जखमी झाला.सदरचा प्रकार लक्षात येताच शेजारील नागरिकाने पार्थला जखमी अवस्थेत कळमेश्वर शहरातील ग्रामीण रुग्णालयात उपचारासाठी नेले.तिथे डॉक्टरांनी तपासणी करून त्याला मृत घोषित केले.स्कूलबसच्या धडकेमुळे पार्थच्या डोके आणि पायाला गंभीर दुखापत झाली होती.त्याला जखमी अवस्थेत पाहताच आई बेशुद्ध पडली.पोलिसांनी बस व चालकास ताब्यात घेतले आहे.याप्रकरणी कळमेश्वर पोलिसांनी गुन्हा नोंद करून तपास सुरू केला आहे.