पुराच्या पाण्यात वाहून जाणारा ग्रामसेवक थोडक्यात बचावला; झाडाला ठेवले धरून.. – गडचिरोली जिल्ह्यातील आजची घटना..

गडचिरोली :-जिल्ह्याच्या अहेरी,मुलचेरा

 व इतर तालुक्यात आज,बुधवार २३ जुलै रोजी जोरदार पाऊस सुरू आहे.पावसामुळे नाले भरभरून वाहू लागलेत.काही ठेंगण्या पुलाच्यावरून पाणी वाहून पुल दिसेनासे होऊ लागले आहेत.अश्यातच जिल्ह्याच्या मुलचेरा तालुक्यातील गोमणी येथील ग्रामसेवक उमेश धोडरे वय ४५ वर्षे हे आज बुधवारच्या सायंकाळी ६ वाजताच्या सुमारास कोलपल्ली नाल्याच्या अचानक वाढलेल्या पुराच्या पाण्यात अडकले.चारचाकी वाहनासह नाला ओलांडत असतांना वाहनाला जोरदार पाण्याचा लोंढा लागला आणि वाहन वाहून गेले.मात्र,प्रसंगावधान राखत  धोडरे यांनी एका झाडाला धरून ठेवले.या घटनेची माहिती मिळताच,महसूल विभाग,पोलीस विभाग आणि स्थानिक बचाव पथक तात्काळ घटनास्थळी दाखल झाले.अतिशय काळजीपूर्वक आणि समन्वयाने बचाव कार्य राबवून धोडरे यांना सुरक्षितरित्या बाहेर काढण्यात आले.त्यानंतर त्यांना तातडीने प्राथमिक आरोग्य तपासणीसाठी रुग्णवाहिकेतून घरी रवाना करण्यात आले.जिल्हा प्रशासनाच्या वेळीच घेतलेल्या कृतीमुळे मोठी दुर्घटना टळली.मुसळधार पावसामुळे नाल्यांना अचानक पूर येण्याच्या घटना वाढल्या असून अशा ठिकाणी प्रवास करतांना अत्यंत सावधगिरी बाळगण्याचे व पूलावरून पाणी वाहत असतांना पाण्यात गाडी न टाकण्याचे आवाहन जिल्हाधिकारी अविश्यांत पंडा यांनी केले आहे.