घरफोड्या करणाऱ्या अट्टल चोरट्यास देसाईगंज येथून अटक… – २१ लाख रुपयांचा मुद्देमाल जप्त..

गोंदिया :-घरफोड्या करणाऱ्या अट्टल चोरट्यास सोन्याच्या दागिन्यांसह तब्बल एक महिन्यानंतर अटक करण्यात स्थानिक गुन्हे शाखा गोंदिया व तिरोडा पोलिसांना यश आले आहे.चोरट्याकडून २१ लाखांचा मुद्देमाल हस्तगत करण्यात आला.विष्णू खोकण विश्वास वय ३४ वर्षे,रा.अरुणनगर,ता.अर्जुनी- मोरगाव असे या चोरट्याचे नाव आहे.

सविस्तर वृत्त असे की, ७ नोव्हेंबर २०२४ रोजी रात्री आठ ते दहाच्या सुमारास तिरोडा येथील दिलीप बन्सोड यांच्या घरी चोरी झाली होती.दागिने व रोख रक्कम असा एकूण १८ लाख ४७ हजार ५०० रुपयांचा मुद्देमाल चोरीला गेला होता.या प्रकरणी तिरोडा पोलिसांनी गुन्हा दाखल करीत तपासकार्य सुरू केले होते.दरम्यान,उपविभागीय पोलिस अधिकारी साहिल झरकर यांच्या मार्गदर्शनात स्थानिक गुन्हे शाखा गोंदियाचे पोलिस निरीक्षक दिनेश लबडे तसेच तिरोड्याचे पोलिस निरीक्षक अमित वानखेडे यांच्या नेतृत्वातील पथक आरोपींचा शोध घेत असतांना घटनास्थळावरून प्राप्त सीसीटीव्ही फुटेज तसेच गोपनीय माहितीच्या आधारे १० नोव्हेंबर रोजी संशयावरून आरोपी रामन्ना ऊर्फ रामचंद्र पोचन्ना ठाकरे वय ३५ वर्षे,रा.देसाईगंज (वडसा)याला ताब्यात घेतले.

त्याची पोलिसांनी सखोल चौकशी केली असता,त्याने यात मुख्य सूत्रधार अट्टल चोरटा विष्णू खोकण विश्वास असल्याचे सांगितले.या माहितीवरून पथक गेल्या महिनाभरापासून गोंदिया,भंडारा,नागपूर जिल्ह्यात तसेच तेलंगणा,छत्तीसगड राज्यात शोध घेत होते.अखेर अट्टल चोरटा विष्णू विश्वास याला देसाईगंज (वडसा)येथून बुधवारी ४ डिसेंबरला ताब्यात घेऊन अटक केली.