चालत्या ट्रॅक्टरवरून खाली उतरण्याच्या प्रयत्नात रोटाव्हेटरमध्ये अडकून युवकाचा मृत्यू

नागपूर :-शेतात रोटाव्हेटर करीत असतांना ट्रॅक्टरवर बसलेला युवक खाली उतरतांना त्याचा पाय अडकला आणि तो चालू रोटाव्हेटरमध्ये अडकला.यात गंभीर दुखापत झाल्याने त्याचा उपचारास नेतांना वाटेतच मृत्यू झाला असल्याची घटना नरखेड पोलिस ठाण्याच्या हद्दीतील सावरगाव शिवारात काल,रविवारी १० नोव्हेंबरच्या सायंकाळी ६ वाजताच्या सुमारास घडली.

स्वप्नील रमेश ठोंबरे वय १९ वर्षे,रा.सावरगाव,ता. नरखेड,जि.नागपूर असे मृत तरुणाचे नाव आहे. त्याच्या वडिलांकडे ट्रॅक्टर आहे.त्याच्या स्वतःच्या शेतात रविवारी रोटाव्हेटर करणे सुरू होते.चुलत भाऊ ट्रॅक्टर चालवित होता स्वप्नील बाजूला बसला होता. रोटाव्हेटरचे काम सुरू असतांना स्वप्नीलने चालत्या ट्रॅक्टरवरून खाली उतरण्याचा प्रयत्न केला आणि पाय अडकल्याने तो खाली रोटाव्हेटरमध्ये अडकला. पडून स्वप्नील उतरत असल्याचे त्याच्या ट्रॅक्टरचालक चुलत भावाला माहिती नव्हते.रोटाव्हेटर फिरणे थांबल्याने हा प्रकार त्याच्या लक्षात आला.तोपर्यंत स्वप्नील गंभीर जखमी झाला होता.सावरगाव येथील प्राथमिक आरोग्य केंद्रात प्रथमोपचार केल्यानंतर त्याला नागपूर शहरातील मेडिकल हॉस्पिटलमध्ये नेण्यात आले.तिथे डॉक्टरांनी तपासणीअंती त्याला मृत घोषित केले.त्याच्या पार्थिवावर आज,सोमवारी दुपारी सावरगाव येथील स्मशानभूमीत अंत्यसंस्कार करण्यात येणार आहे.