गाय आडवी आली आणि चालकाने ब्रेक दाबला; तीन वाहने एकमेकांवर आदळली… -भाजपचे चार कार्यकर्ते जखमी…

नागपूर :-विधानसभा निवडणुकीसाठी उमेदवारी अर्ज भरण्यासाठी जात असलेल्या भाजप कार्यकर्त्यांच्या वाहनाला गाय आडवी आली आणि चालकाने ब्रेक दाबले.त्यातच मागून वेगात येत असलेल्या वाहनांपैकी तीन वाहने एकापाठोपाठ एक समोरच्या वाहनांवर आदळली.या अपघातात चार कार्यकर्ते जखमी झाले.सदरची घटना सावनेर शहरालगत कळमेश्वर-सावनेर बायपास रोडवर काल, मंगळवारी २९ ऑक्टोंबरच्या सकाळी ११.३० वाजताच्या सुमारास घडली.

प्रशांत ठाकरे,प्रमोद ढोले,प्रमोद गोलाईत व प्रकाश ठाकरे सर्व रा.सावनेर अशी जखमी कार्यकर्त्यांची नावे आहेत. भाजपचे उमेदवार डॉ.आशिष देशमुख यांनी काल मंगळवारी सावनेर शहरातील उपविभागीय अधिकारी कार्यालयात उमेदवारी अर्ज दाखल केला.शक्ती प्रदर्शनासाठी त्यांनी कार्यकर्त्यांना सावनेर शहरात बोलावले होते.आशिष देशमुख यांचे वाहन सर्वात समोर होते तर कार्यकर्त्यांची वाहने त्यांच्या मागे एकापठोपाठ एक वेगात कळमेश्वरहून सावनेरच्या दिशेने येत होती.या ताफ्यातील एका वाहनाला गाय आडवी आल्याने चालकाने वाहनाने ब्रेक दाबले. क्षणात एमएच- ४०/सीएच-५९९९ क्रमांकाची ह्युंदई कार,एमएच-४०/सीएक्स-१७१० क्रमांकाची स्कॉर्पिओ,एमएच- ४०/सीएक्स-००७२ इनोव्हा व एमएच-४०/एसी-८५२४ क्रमांकाची वॅगन आर ही वाहने एकमेकांवर आदळली. यात चौघे जखमी झाले.माहिती मिळताच वाहतूक शाखेच्या सहायक पोलिस निरीक्षक सुहासिनी सहस्त्रबुद्धे यांनी घटनास्थळ गाठून चारही जखमींना हितेश बन्सोड यांच्या मदतीने सावनेर शहरातील खासगी हॉस्पिटलमध्ये भरती केले.