३१ वर्षीय विवाहित महिलेचा शेतातील बोडीत पडून दुर्दैवी मृत्यू..

गोंदिया :-तालुक्याच्या पुराडा गट ग्रामपंचायत अंतर्गत येणाऱ्या महाजनटोला येथील एका ३१ वर्षीय विवाहित महिलेचा शेतातील बोडीमध्ये पडून दुर्दैवी मृत्यू झाल्याची घटना काल बुधवारी सकाळच्या सुमारास घडली.सरिता ओमप्रकाश आचले वय ३१ वर्षे,रा.महाजनटोला, ता.गोंदिया असे मृत पावलेल्या महिलेचे नाव असून ती शेत शिवारातील बोडीजवळ शौचास बसलेली होती.

महाजनटोला येथील सरिता आचले ही काल बुधवारी सकाळी शेतावर गेली होती.दरम्यान,सरिता शौचासाठी बोडीजवळ बसली असता तिचा पाय घसरून ती बोडीत पडली.यातच सरिताचा दुर्दैवी मृत्यू झाला.शेतात गेलेली सरिता घरी लवकर परत न आल्याने कुटुंबीयांनी शोध घेतला असता सकाळी साडे आठ वाजताच्या सुमारास शेताजवळील बोडीतील सरिताचा मृतदेह तरंगताना आढळला.घटनेची माहिती मिळताच सालेकसा पोलिसांनी घटनास्थळी धाव घेतली.नागरिकांच्या मदतीने मृतदेह पाण्यातून बाहेर काढून देवरी येथील ग्रामीण रुग्णालयात उत्तरीय तपासणीसाठी पाठवून शवविच्छेदन करण्यात आले.सरिता पश्चात पती,एक मुलगा,एक मुलगी असून सरिताच्या मृत्यूमुळे दोन मुले आईच्या प्रेमाला कायमची मुकली.