११ व्या वर्गातील विद्यार्थिनी जळाली; उपचारादरम्यान मृत्यू… – चुली जवळ बसून करीत होती अभ्यास..

गोंदिया :-गेली तीन ते चार दिवसांपासून थंडीचा कहर कमी झाला असला तरीही रात्रीच्या सुमारास तसेच पहाटे अजूनही थंडीचा जोर कायम आहे.हल्ली चुली ऐवजी गॅसवर स्वयंपाक वा इतर कार्ये केली जात असली तरीही ग्रामीण भागात आजही चुलीवर पाणी गरम करणे व इतर बाबी केल्या जातात.अशातच गोंदिया जिल्ह्याच्या देवरी तालुक्यात एक अनुचित तथा दुर्दैवी घटना उघडकीस आल्याने गावात हळहळ व्यक्त केल्या जात आहे.११ व्या वर्गात शिक्षण घेणारी चांदणी किशोर शहारे वय १७ वर्षे,रा.मरामजोब,ता. देवरी,जि.गोंदिया ही शुक्रवारी २७ डिसेंबरला  पहाटे ५ च्या सुमारास अभ्यास करण्यासाठी उठली.पहाटे थंडी वाटत असल्याने घरी पेटविलेल्या चुलीजवळ अभ्यास करीत होती.अशातच अभ्यास करीत असतांना अचानक चुलितील विस्तव चांदणीच्या कपड्यांना लागला.त्यामुळे अचानक लागलेल्या आगीत ती पूर्णतः जळाली.कुटुंबीयांना लक्षात येताच धाव घेत एकच हंबरडा फोडला.त्यानंतर चांदणीला गंभीर अवस्थेत देवरीच्या ग्रामीण रुग्णालयात दाखल करण्यात आले.मात्र,शरीर जास्त जळाल्याने गोंदियाला हलविले. प्रकृती गंभीर असल्याने नागपूरला हलविण्यात आले. नागपूरच्या रुग्णालयात उपचार सुरू असतांना अखेर चांदणीचा उपचारादरम्यान मृत्यू झाला.घडलेल्या घटनेमुळे कुटुंबीयांना मोठा हादरा बसला असून गावात चांदणीच्या मृत्यूने हळहळ व्यक्त केल्या जात आहे.