सोन्याच्या दरात उसळी; सर्वसामान्यांचे बजेट विस्कटले..!

उद्रेक न्युज वृत्त :-जागतिक बाजारातील आर्थिक अनिश्चितता,विदेशी चलन म्हणजेच डॉलरच्या मूल्यातील चढउतार,त्याचबरोबर गुंतवणूकदारांचा वाढता कल, यामुळे सोन्याच्या दरात सतत उसळी(वाढ)होतांना दिसून येत आहे.सोन्याच्या दराची उसळी पाहता ग्राहकांमध्ये मोठी खळबळ माजली असून सोने खरेदी करू पाहणाऱ्या सर्वसामान्यांचे बजेट पूर्णपणे विस्कटले आहे. आजची स्थिती बघितली तर चालू सप्टेंबर महिन्यात जीएसटीसह सोन्याच्या दरात तब्बल ७ हजार ४४३ रुपयांची वाढ झाली आहे.एकाच दिवसात सोन्याच्या दरात तब्बल ६०० रुपयांची उसळी नोंदवली गेली. नागपुरात काल सोमवारी ३ टक्के जीएसटीसह २४ कॅरेटचे सोने १ लाख ११ हजार ३४३ रुपयांत विकले गेले.समोर नवरात्र,दसरा आणि दिवाळीसारखा मोठा सण येत आहे.ऐन सणासुदीच्या दिवसांत सोन्याच्या किंमती भाव खाऊ लागल्या आहेत.अश्यातच सोन्याच्या दरात अशीच वाढ होत राहिली तर पुढील काळात लग्नसमारंभासाठी सोने खरेदी करणाऱ्या कुटुंबांचे बजेट पूर्णपणे कोलमडल्याशिवाय राहणार नाही.