सूरजागड लोहखनिज विदर्भाबाहेरील उद्योगांना अवैधरित्या विकल्या जात असल्याचा आरोप.. – मुंबई उच्च न्यायालयाच्या नागपूर खंडपीठाने सरकारला फटकारले…

नागपूर :-गडचिरोली जिल्ह्यातील एटापल्ली तालुकास्थित सूरजागड खाण लॉयड्स मेटल ॲण्ड एनर्जी कंपनीला ५० वर्षांच्या लीजवर देण्यात आली आहे.शासन आणि कंपनी सोबत २००७ मध्ये लीज करार झाला आहे.अशातच प्रकृती फाउंडेशन या सामाजिक संस्थेने ३ फेब्रुवारी २०२३ रोजी राज्य सरकारला निवेदन सादर करून सूरजागडमधील लोहखनिज विदर्भाबाहेरील उद्योगांना अवैधरित्या विकल्या जात असल्याचा आरोप केला आहे.त्यावर सरकारने अद्याप निर्णय घेतला नाही.त्यामुळे मुंबई उच्च न्यायालयाच्या नागपूर खंडपीठाने काल बुधवारी सरकारला फटकारले व यावर उद्या शुक्रवारी स्पष्टीकरण सादर करा; असे निर्देश दिले.

प्रकरणावर न्यायमूर्तीद्वय नितीन सांबरे व वृषाली जोशी यांच्यासमक्ष सुनावणी झाली.दरम्यान, फाउंडेशनचे वकील ॲड.महेश धात्रक यांनी सरकारच्या उदासीन भूमिकेकडे न्यायालयाचे लक्ष वेधले.न्यायालयाने १८ जानेवारी २०२३ रोजी फाउंडेशनच्या निवेदनावर निर्णय घेण्याचा आदेश सरकारला दिला होता.तसेच,याकरिता ३ मे व ७ जून २०२३ आणि ७ फेब्रुवारी २०२४ रोजीही आवश्यक निर्देश दिले होते.परंतु,सरकारने त्या आदेशाचे अद्याप पालन करण्यात आले नसल्याचे ॲड.धात्रक यांनी न्यायालयाच्या निदर्शनास आणून दिले.त्यामुळे न्यायालयाने सदरची बाब गंभीरतेने घेतली.