सावधान..! वृद्ध निराधार महिलेच्या अज्ञानाचा गैरफायदा घेत १० हजारांना गंडा… – कोरची तालुक्यातील घटना..

गडचिरोली :-जिल्ह्याच्या कोरची तालुक्यात नुकताच  एक धक्कादायक प्रकार उघडकीस आला आहे.दोन अज्ञात भामट्यांनी एका वृद्ध निराधार महिलेच्या अज्ञानाचा गैरफायदा घेत हाताच्या बोटाचे ठसे घेऊन १० हजार रुपयांना गंडा घातल्याचा प्रकार उघडकीस आल्याने कोरची तालुक्यात एकच खळबळ उडाली आहे.

मिळालेल्या माहितीनुसार,कोरची तालुक्यातील ग्राम साल्हे येथील कमलीबाई सियाराम कल्लो वय ६५ वर्षे या वृद्ध निराधार महिलेच्या घरी दोन अज्ञात इसम गेले व तिच्या अज्ञानाचा गैरफायदा घेत ‘आम्ही आयुष्यमान भारत योजना कार्यान्वित करण्यासाठी

कुरखेडा उपविभागीय अधिकारी कार्यालय(SDM) येथून आलेलो असून शासनाचे एजंट आहोत’; ‘आम्ही तुमचे आयुष्यमान कार्ड अपडेट करून देतो’ असे सदर वृध्द महिलेस सांगून आधार कार्ड तसेच बँकेचे पासबुक घेऊन महिलेचे बायोमेट्रिक (biometric) पद्धतीने हाताच्या बोटाचे ठसे (thumb impression) घेतले व निघून गेले.काही अवधीनंतर सदर महिलेच्या खात्यातून १० हजार रुपये काढण्यात आल्याचा मॅसेज आल्याने सदर प्रकार उघडकीस आला.त्यानुसार वृध्द महिलेने कोरची पोलीस ठाणे गाठून तक्रार दाखल केली आहे.पोलिसांनी अज्ञात भामट्यांविरोधात फसवणुकीचा गुन्हा दाखल करून पुढील तपास सुरू केला आहे.

हल्ली ऑनलाईन फसवणुकीचे वेगवेगळे प्रकार चोरटे वापरत असून चोरट्यांनी आता ग्रामीण भागातील अज्ञान व्यक्तींचा गैरफायदा घेण्याची नवी शक्कल लढविल्याचे सदर प्रकारावरून दिसून येत आहे.त्यामुळे नागरिकांनी सतर्कता बाळगावी; असे आवाहन कोरेची पोलीस प्रशासनाच्या वतीने करण्यात आले आहे.