शिक्षक मान्यता व मुख्याध्यापक पदोन्नतीच्या प्रकरणातील संपूर्ण कागदपत्रांसह हाजिर हो..

नागपुर :-शालार्थ आयडी घोटाळा उघडकीस येताच बड्या माश्यांसह छोटे मासे गळाला लागले.तत्पूर्वी अनेकांनी चुप्पी साधून लाखोंची मोहमाया गोळा केली. नुसत्या एका चर्चेवरून प्रकरणाचा उलगडा झाल्याने अनेकांचे धाबे दणाणले.नागपूरच्या शिक्षण उपसंचालक विभागात घोटाळा उघड होताच सर्वांची कामे बंद करून पुढील नंबर कुणाचा? याकडे सर्वांचे लक्ष लागून होते. अश्यातच आता शिक्षक व मुख्याध्यापक भरती घोटाळ्याचे धागेदोरे भंडारा जिल्ह्यातून पुढे सरकू लागले आहे.विशेष तपास पथकाने(एसआयटी)येथील शिक्षण विभागाकडील सर्व संबंधित फाइल्स नागपूर येथे सादर करण्याचे आदेश दिले आहेत.आज,गुरुवार १८ डिसेंबरला भंडारा जिल्ह्यातील शिक्षण विभागातील अधिकाऱ्यांना शिक्षक मान्यता व मुख्याध्यापक पदोन्नतीच्या प्रकरणातील संपूर्ण कागदपत्रांसह नागपूरला हजर राहण्यास सांगण्यात आले आहे.या कारवाईमुळे जिल्ह्यातील शिक्षण विभागात,तसेच संस्थाचालकांमध्ये एकच खळबळ उडाली आहे.शिक्षक मान्यता, मुख्याध्यापक पदोन्नती,नियुक्ती आदेश,प्रस्ताव व संबंधित पत्रव्यवहाराची एसआयटीकडून कसून तपासणी केली जाणार आहे आणि दोषी आढळणाऱ्या कर्मचाऱ्यांवर कारवाईची टांगती असल्याने अनेकांच्या मनात धडकी भरली आहे.