शालार्थ आयडी घोटाळ्यातील आरोपींचा पक्का चिठ्ठा तयार..

नागपूर :-जिल्ह्यातील शालार्थ आयडी घोटाळ्याचा कच्चा नाही,तर पक्का चिठ्ठा तयार झाला असून घोटाळ्यातील सर्व फाईली तपासण्यात आल्याने  याबाबत येत्या,शुक्रवार २ जानेवारी २०२६ रोजी अंतिम अहवाल सादर होणार आहे.शालार्थ आयडी प्रकरणांत एकूण २६ आरोपींविरोधात दोषारोपपत्र दाखल करण्यात आले आहेत.यात ४ विभागीय शिक्षण उपसंचालक, ४ शिक्षणाधिकारी,४ लिपिक,३ शाळा मुख्याध्यापक,२ शाळा संचालक,८ सहाय्यक शिक्षक तसेच १ वेतन अधीक्षक असे एकूण २६ आरोपी अटक करण्यात आलेले आहेत.यातील बहुतांश जामिनावर बाहेर आहेत. घोटाळ्यात एकूण ६७३ शिक्षकांचे वेतन निघाले.मृतक शिक्षणाधिकारी सोमेश्वर नैताम यांच्या सहीनेही बनावट शालार्थ आयडी तयार करण्यात आले.मात्र,त्याची संपूर्ण फाइलच शिक्षण विभागातून गहाळ झाली आहे.नागपूर विभागात घोटाळ्यात प्रमुख १३ आरोपींनी तब्बल १ हजार ९७२ बनावट आयडी तयार करून तब्बल १५० कोटींची फसवणूक केल्याचे सूत्रांचे म्हणणे आहे.यात चिंतामन वंजारी यांनी-२५३ आयडी,रवींद्र काटोलकर -३९ आयडी,रोहिणी कुंभार-२४४,सिद्धेश्वर काळुसे-१५४,अनिल पारधी-८१,वैशाली जामदार-२११, सतीश मेंढे-८३,उल्हास नरड- १८७,गौतम गेडाम -४०, नीलेश वाघमारे-६८० इत्यादी शालार्थ आयडी तयार करण्यात आल्या आहेत.सर्व फाईली तपासण्यात आल्याने आता अंतिम अहवाल तयार झाला आहे.त्यावर संबंधित वरिष्ठांच्या सह्या झाल्यानंतर येत्या २ जानेवारी २०२६ रोजी अहवाल सादर केला जाईल,असे शालार्थ आयडी घोटाळ्याची प्रशासकीय चौकशी करीत असलेले प्राथमिक व माध्यमिक विभाग संचालक महेश पालकर यांनी स्पष्ट केले.