वळण मार्गावर दुचाकीचा अपघात; चालकाचा घटनास्थळीच मृत्यू..

कुरखेडा(गडचिरोली):-कुरखेडा तालुक्याच्या येंगलखेडा येथील आदिवासी विकास कार्यकारी (आविका)संस्थेच्या संचालकाचा आज,रविवार ११ जानेवारी रोजी दुपारच्या सुमारास अपघात होऊन घटनास्थळीच मृत्यू झाल्याची घटना घडली.सदरचा अपघात हा तालुक्याच्या सोनसरी-उराडी या वळण मार्गावर झाला.रतीराम घनचू हलामी वय ५० वर्षे, रा.येंगलखेडा,ता.कुरखेडा,जि.गडचिरोली असे अपघातात मृत पावलेल्या संचालकाचे नाव असून ते आज रविवारी सकाळच्या सुमारास एमएच ३३ एजी ९६८६ क्रमांकाच्या दुचाकीने कूलकुली व चवेला येथे गेले होते.तेथील कामे आटोपून दुपारच्या सुमारास देलनवाडी-उराडी-सोनसरी या परतीच्या मार्गावर असतांनाच वळण मार्गावर त्यांचा दुचाकीवरील ताबा सुटला आणि वाहन रस्त्याच्या कडेला असलेल्या दगडावर आपटून झाडाला जाऊन जोरदार आपटले.यात रतीराम यांच्या डोक्याला जबर मार लागल्याने डोक्यातून मोठ्या प्रमाणावर रक्तस्त्राव होऊन घटनास्थळीच मृत पावले.मार्गावरून जाणाऱ्या नागरिकांनी घटनास्थळी धाव घेत याबाबत कुरखेडा पोलिसांना माहिती दिली.पोलिसांनी घटनास्थळ गाठून पंचनामा करून मृतदेह उत्तरीय तपासणीसाठी कुरखेडा उपजिल्हा रुग्णालयात पाठविला.घटनेचा पुढील तपास कुरखेडा पोलीस प्रशासन करीत आहे.