लाडकी बहिण योजनेतील बोगस लाभार्थ्यांची नावे उघड… – तब्बल १,१७१ अर्ज दुसऱ्या राज्यातील…

उद्रेक न्युज वृत्त :-महाराष्ट्र राज्यातील लाडकी बहिण योजनेत एक,दोन नाही तर तब्बल १,१७१ अर्ज दुसऱ्या राज्यातील असल्याचे उघड झाल्याने एकच खळबळ उडाली आहे.यात अंगणवाडी सेविका असल्याचे भासवून लॉगिन आयडी तयार करून अर्ज भरण्यात आल्याचे तपासात उघड झाले आहे.महत्वाचे म्हणजे अर्जदार हे पश्चिम बंगाल आसाम राजस्थान

आणि उत्तर प्रदेशातील असल्याचे उघड झाले आहे. याप्रकरणी आता सोलापूर जिल्ह्यातील बार्शी पोलीस ठाण्यात गुन्हा दाखल करण्यात आला आहे.

एकट्या बार्शी तालुक्यात २२ बोगस अर्ज आले होते. त्यांना मिळणारे पैसे आता तातडीने थांबवण्यात आले आहेत.बार्शी तालुक्यातील एका गावात मुस्लिम महिलांचे अर्ज सापडले.प्रत्यक्ष गावात एकही मुस्लिम कुटुंब नाही.अधिकाऱ्यांकडून आधारकार्ड क्रमांक, बँक खात्याच्या आधारे तपासणी केल्यानंतर बनावट खाती उत्तर प्रदेश,आसाम,पश्चिम बंगाल, राजस्थानातील असल्याचे उघड झाले.यात लॉगईन आयडीचा गैरवापर झाल्याचे निदर्शनास आले आहे.

बनावट लॉगिन आयडीचा गैरवापर करुन हा घोटाळा करण्यात आला.सरकारी वेबसाईटवर लॉगिन आयडी तयार करण्याची सुविधा दिली होती.एका लॉगईन आयडीवर अनेक अर्ज भरण्याची सोय आहे. ‘मुनमुन ठाकरे अंगणवाडी सेविका,हजारवाडी जि.सांगली’ ‘अनवरा बेगम अंगणवाडी सेविका,बोरगाव बु., जि. लातूर’ या दोन बनावट आयडीद्वारे तब्बल १,१७१ अर्ज भरले गेले.प्रत्यक्ष चौकशीत अशा अंगणवाडी सेविका नसल्याचे उघड झाले आहे.