रुपयाची घसरण चिंताजनक; महागाईचे संकेत..

उद्रेक न्युज वृत्त :-आज भारतीय रुपयामध्ये ऐतिहासिक घसरण झाली.त्यामुळे,भारतीय चलन बाजारासाठी आजचा दिवस अत्यंत धक्कादायक ठरला.आज,सोमवार ११ मे रोजी दुपारी साडे चार वाजेच्या सुमारास अमेरिकन डॉलरच्या तुलनेत रुपया ९५.२५ या ऐतिहासिक नीचांकी पातळीवर पोहोचला. रुपयाने प्रथमच ९५ रुपयांच्या पलीकडे पातळी ओलांडल्याने भारतीय अर्थव्यवस्थेसमोर मोठे आव्हान उभे राहिले आहे. रुपयाच्या घसरणीचा थेट परिणाम सर्वसामान्यांच्या बजेटवर होणार आहे.कच्च्या तेलाचे दर वाढल्याने देशात पेट्रोल आणि डिझेल महाग होण्याची शक्यता आहे. याशिवाय,आयात केल्या जाणाऱ्या वस्तू जसे की, इलेक्ट्रॉनिक उपकरणे आणि खाद्यतेले यांच्या किमतीतही वाढ होऊ शकते.जे नागरिक परदेश प्रवासाचे किंवा शिक्षणाचे नियोजन करत आहेत,त्यांना आता डॉलर खरेदीसाठी अधिक रुपये खर्च करावे लागतील. अमेरिकेचे राष्ट्राध्यक्ष डोनाल्ड ट्रम्प यांनी इराणचा प्रस्ताव फेटाळल्याने जागतिक बाजारपेठेत अनिश्चितता वाढली आहे.परिणामी,सुरक्षित गुंतवणूक म्हणून डॉलरकडे ओघ वाढला आहे.जागतिक तणावामुळे विदेशी पोर्टफोलिओ गुंतवणूकदारांनी भारतीय शेअर बाजारातून मोठ्या प्रमाणात भांडवल काढून घेण्यास सुरुवात केली आहे. भारतीय रिझर्व्ह बँकेने रुपया सावरण्याचा प्रयत्न केला असला,तरी जागतिक स्तरावरील दबावामुळे रुपयाची घसरण रोखणे कठीण झाले आहे.