चालू कूलरला हात लावू नका; कूलरला हात लागताच तंटामुक्ती समिती अध्यक्षाचा मृत्यू..

गडचिरोली :-उन्हाळ्याचे दिवस असल्याने अनेकजण घरात कूलर लावून थंड हवा घेण्याचा प्रयत्न करतात.पण, तोच कूलर एखादेवेळी जीवघेणा ठरू शकतो.अशीच एक घटना गडचिरोली जिल्ह्याच्या अहेरी तालुक्यात उघडकीस आली आणि अख्ख्या गावात शोककळा पसरली.कूलरची हवा गरम येत असल्याने कूलरमधील खसवर(गवत)पाणी पडून थंड हवा यावी यासाठी कूलरवरील बुजलेली छिद्रे मोकळी करत असतांनाच चालू कूलरच्या लोखंडी बॉडीला हात लागला आणि जोरदार करंट लागून माजी तंटामुक्ती समिती अध्यक्षाचा मृत्यू झाल्याची घटना काल रविवारी सकाळच्या सुमारास अहेरी तालुक्याच्या चिंचगुंडी गावात घडली.प्रभाकर तोगरवार वय ५५ वर्षे असे मृत पावलेल्या माजी तंटामुक्ती समिती अध्यक्षाचे नाव असून त्यांच्या पश्चात पत्नी,दोन मुले आणि दोन मुली असा आप्तपरिवार आहे. घटनेने तोगरवार कुटूंबीय शोकसागरात बुडाला असून सर्वत्र हळहळ व्यक्त केली जात आहे.

• नागरिकांना आवाहन👇

कूलरचा वापर करणाऱ्या नागरिकांनी कूलर चालू म्हणजेच सुरू असतांना कूलरमध्ये पाणी भरणे वा इतर क्रिया करू नये.विशेषतः कूलरची बोर्डवरील पिन काढूनच कूलरमध्ये पाणी भरणे तसेच कूलरवरील बुजलेली छिद्रे मोकळी करावीत.कूलरचा करंट लागत नाही म्हणून अनेकजण चालू कूलरमध्ये पाणी भरत असतात.पण,एखादेवेळी अचानकपणे दुर्घटना घडत असते.त्यामुळे सतर्कता बाळगणे गरजेचे आहे.