बँक अध्यक्षपदाच्या अपात्रता प्रकरणी बच्चू कडूंना दिलासा.. – मुंबई उच्च न्यायालयाच्या नागपूर खंडपीठाचा मोठा निर्णय..

नागपूर :-माजी राज्यमंत्री तथा प्रहार जनशक्ती पक्षाचे अध्यक्ष बच्चू कडू यांनी शेतकरी कर्जमाफीसह विविध १७ मागण्यांसाठी ८ जून २०२५ पासून अन्नत्याग आंदोलन सुरू केले होते.विरोधी पक्षातील नेत्यांसह विविध संघटनांनी बच्चू कडू यांच्या आंदोलनाला पाठिंबा जाहीर केला होता.त्यानुसार  आंदोलनाची महायुती सरकारने दखल घेत बच्चू कडू यांना लेखी आश्वासन दिल्याने शनिवार १४ जून रोजी अन्नत्याग आंदोलन आणि चक्का जाम आंदोलन स्थगित करीत करण्यात आले होते.आंदोलन स्थगित करताच बच्चू कडू यांना अमरावती जिल्हा बँकेच्या अध्यक्षपदावरून १६ जून रोजी अपात्र ठरविण्यात आले होते.बच्चू कडू यांच्याविरुद्ध २०१७ मध्ये नाशिक येथील एका आंदोलनप्रकरणात सुकरवाडा पोलिस ठाण्यात गुन्हा दाखल करण्यात आला होता.शासकीय कामात अडथळा आणि मारहाण केल्यावरून न्यायालयाने त्यांना एक वर्षाची शिक्षा ठोठावण्यात आली होती.अमरावती जिल्हा मध्यवर्ती सहकारी बँकेच्या नियमानुसार,बँकेच्या संचालकाला न्यायालयाने एक वर्षापर्यंतची शिक्षा सुनावल्यास त्याला पदावर राहता येत नाही.हीच बाब पुढे करीत बँकेच्या विरोधी गटातील बारा संचालकांनी हरिभाऊ मोहोड यांच्या नेतृत्वाखाली बच्चू कडू यांना अपात्र ठरविण्याची मागणी केली होती.सहकार विभागाचे विभागीय सहनिबंधक प्रवीण फडणीस यांनी या तक्रारीची दखल घेत बच्चू कडू यांना नोटीस बजावली होती.यानंतर बच्चू कडू यांना त्यांचे म्हणणे मांडण्यास सांगण्यात आले होते.याआधारे सहनिबंधकांनी त्यांना अपात्र ठरविण्याचा निर्णय घेतला होता.शिवाय त्यांना पाच वर्षांपर्यंत बँकेची कोणतीही निवडणूक लढता येणार नव्हती.याविरुद्ध बच्चू कडू यांनी मुंबई उच्च न्यायालयाच्या नागपूर खंडपीठात आव्हान दिले होते. यावर आज,मंगळवार २४ जून रोजी मुंबई उच्च न्यायालयाच्या नागपूर खंडपीठात सुनावणी झाली. सुनावणीत न्यायालयाने विभागीय सहनिबंधकांच्या आदेशाला स्थगिती दिली आहे.यामुळे बच्चू कडू यांना मोठा दिलासा मिळाला आहे.न्यायालयाने अमरावती जिल्हा बँकेच्या अध्यक्षपदावरून दिलेला निर्णय हा सत्याचा विजय आहे,अशा शब्दांत बच्चू कडू यांनी न्यायालयाच्या निकालाचे स्वागत केले आहे.