पेपर सुरू होण्यापूर्वीच व्हॉट्सॲपवर प्रश्नपत्रिका; आज दोघांना बेड्या..

नागपूर :-सिव्हिल लाइन्स परिसरातील सेंट उर्सुला हायस्कूलमधील परीक्षा केंद्रावर बुधवार १८ फेब्रुवारी रोजी रसायनशास्त्राचा(केमेस्ट्री)पेपर होता.तेथील एक विद्यार्थिनी साधारणतः बारा वाजण्याच्या सुमारास प्रसाधनगृहात गेली.सुमारे १५ मिनिटे ती वर्गात न आल्याने केंद्रावरील पर्यवेक्षकांना संशय आला.तिची झडती घेतली असता एक स्मार्ट फोन आढळला.तो जप्त करण्यात आला.तो तपासला असता त्यामध्ये एका व्हॉटस्ॲप ग्रुपवर परीक्षा सुरू होण्यापूर्वीच पेपर आलेला होता.तसेच त्याच ग्रुपवर प्रश्नांची उत्तरेसुद्धा आलेली होती.संबंधित विद्यार्थिनीने तिच्या मैत्रिणीचेही नाव सांगितले.दोघींचीही चौकशी केली असता त्या एकाच व्हॉटस्ॲप ग्रुपवर असल्याचे स्पष्ट झाले.विद्यार्थिनींच्या मोबाइलमध्ये १६ फेब्रुवारी रोजी झालेला भौतिकशास्त्राचाही(फिजिक्स)पेपर सापडला.हा प्रकार शिक्षण विभागालाही कळविण्यात आला. शिक्षणाधिकारी(माध्यमिक)अनिल दहीफळे यांच्या तक्रारीवरून सदर पोलिसांनी पेपर फोडणाऱ्यावर गुन्हा दाखल केला होता.प्रकरणी राज्याचे शालेय शिक्षण राज्यमंत्री पंकज भोयर यांनी या प्रकरणाची गांभीर्याने दखल घेत अहवाल देण्याचे आदेश दिलेले असतांनाच विद्यार्थिनीची चौकशी आणि तांत्रिक तपास केल्यावर तो पेपर एका शिकवणी वर्गातून फोडण्यात आल्याची माहिती समोर आली.त्यावरून,सदर पोलिसांनी आज, रविवार २२ फेब्रुवारी पहाटेच्या सुमारास सापळा रचून दोघांना अटक केली आहे.निशिकांत मूल वय ४० वर्षे,रा. मानकापूर व फरहान फहीम वय १८ वर्षे,रा.कपिलनगर अशी आरोपींची नावे असून निशिकांत मूल याची मानकापूर परिसरात ‘मूल ॲकेडमी’ या नावाने शिकवणी वर्ग आहे.त्यात दहावी,बारावीच्या विद्यार्थ्यांसह जेईईची शिकवणी घेण्यात येते.त्यात बारा ते पंधरा विद्यार्थी शिकतात.चौकशीदरम्यान,अधिकाऱ्यांना असे आढळून आले की ज्या व्हाट्सॲप ग्रुपद्वारे प्रश्नपत्रिका प्रसारित केल्या गेल्या होत्या तो त्यानेच तयार केला होता.ग्रुप चालवण्यासाठी वापरलेला मोबाईल नंबर देखील त्याच्या नावाने नोंदणीकृत होता.दुसरा आरोपी फरहान फहीम हा एक विद्यार्थी आहे.तो व्हॉट्सॲप ग्रुपचा सदस्य आहे. विद्यार्थ्याने या व्हॉट्सॲप ग्रुपवर प्रश्नपत्रिका पोस्ट केल्याची माहिती आहे.प्रकरणी सदर पोलिसांनी दोघांनाही न्यायालयासमोर हजर केले असता, न्यायालयाने त्यांना २६ फेब्रुवारीपर्यंत पोलिस कोठडी सुनावली आहे.