उद्रेक न्युज वृत्त
ब्रम्हपुरी(चंद्रपूर) :- ब्रम्हपुरी तालुक्यात गत दोन दिवसांपासून मुसळधार पाऊस सुरू आहे.त्यामुळे जनजीवन विस्कळीत झाले आहे.पावसाचा हाहाकार सर्वत्र सुरू आहे.मुसळधार पावसामुळे वैनगंगा नदी दुथळी भरून वाहत असून ब्रम्हपुरी तालुक्यातील नाल्यांना पूर आला आहे.तर अनेक ठिकाणी रस्ते, पूल पाण्याखाली गेल्यामुळे १२ गावांचा संपर्क तुटला आहे.मागील दोन दिवसांपासून शहरी आणि ग्रामीण भागात पावसाची संततधार सुरू असून सर्वत्र पावसाने अक्षरशः धुमाकूळ घातला आहे.
ब्रम्हपुरी येथील भूतीनाल्यावर पुलाचे काम सुरू आहे. त्यामुळे ब्रम्हपुरीवरून देसाईगंजला ये-जा करण्यासाठी कच्चा रस्ता तयार करण्यात आला होता. मात्र,पावसामुळे तो रस्ता वाहून गेला.त्यामुळे वाहनचलकांना ब्रम्हपुरी-कुर्झा-अर्हेरनवरगाव-पिंपळगाव-सोंदरी देसाईगंज असा मार्गक्रम करित प्रवास करावा लागत आहे.अर्हेरनवरगाव ते कुर्झा नाल्यावर मागील दोन दिवसांपासून पाणी वाहत असल्याने ही वाहतूक ठप्प झाली आहे.
