तुंबळ चकमकीत जहाल महिला नक्षलीस कंठस्नान..!

उद्रेक न्युज वृत्त :-छत्तीसगडच्या काँकेर जिल्ह्यातील माचपल्लीच्या जंगलात आज,सोमवार १३ एप्रिल रोजी सुरक्षा दल आणि नक्षलवाद्यांमध्ये उडालेल्या चकमकीत जहाल महिला नक्षलीस कंठस्नान घालण्यात सुरक्षा दलास मोठे यश मिळाले आहे.चकमकीत रंगाबोईना भाग्या उर्फ रुपी रेड्डी असे ठार झालेल्या महिला नक्षलीचे नाव असून शासनाने तिच्यावर तब्बल पाच लाख रुपयांचे बक्षीस जाहीर केले होते.ती मूळची तेलंगणा राज्याची रहिवासी होती आणि २००४ पासून नक्षल चळवळीत सहभागी झाली.छत्तीसगडमधील माड डिव्हीजनची विभागीय समितीची सदस्य होती.त्याचबरोबर उत्तर बस्तर क्षेत्रातील परतापूर क्षेत्रिय समिती सदस्य(एसीएम) होती.छत्तीसगडमध्ये कार्यरत तेलंगणा कॅडरची ती अखेरची नक्षलवादी होती.छत्तीसगड राज्यातील जहाल नक्षलवादी तथा स्पेशल झोनल कमिटी मेंबर सुगुलुरी चिन्नाना उर्फ विजय रेड्डी याची रुपी ही पत्नी होती.१३ ऑगस्ट २०२५ रोजी छत्तीसगडच्या मोहल्ला-मानपूर-अंबागड चौकी जिल्ह्यात झालेल्या चकमकीत विजय रेड्डी ठार झाला होता.त्यानंतरही रुपी ही नक्षल दलममध्ये सक्रिय होती.रुपी रेड्डी ही आत्मसमर्पण करण्यास तयार नव्हती.अश्यातच आज तिचा खात्मा करण्यात आला. काँकेर जिल्ह्याच्या छोटेबेठिया पोलिस ठाण्यांतर्गत येणाऱ्या माचपल्लीच्या जंगल परिसरात काही नक्षली सक्रिय असल्याची माहिती सुरक्षा दलास मिळताच  नक्षलविरोधी अभियान राबविण्यास सुरुवात केली होती.अभियान राबवित असतांनाच सुरक्षा दल

आणि नक्षल्यांमध्ये चकमक उडाली.सुरक्षा दलांचा वाढता दबाव पाहून घटनास्थळावरून काही नक्षलवादी पसार झाले.दरम्यान,सुरक्षा दलांनी शोधमोहीम राबवली असता एका महिला नक्षलीचा मृतदेह आणि काही शस्त्रे सापडली.मृत नक्षली ही रंगाबोईना भाग्या उर्फ रुपी रेड्डी असल्याचे स्पष्ट झाले.