उद्रेक न्युज वृत्त
भंडारा :- जिल्ह्याच्या लाखांदूर तालुक्यातील पवनी येथे ट्रकने,ट्रॅक्टरला मार्ग न दिल्याने ट्रॅक्टर थेट नदीत कोसळल्याने ट्रॅक्टरवरील एक जागीच ठार तर दोघेजण गंभीर जखमी झाले असल्याची घटना आज दुपारच्या सुमारास लाखांदूर-पवनी मार्गावरिल चुलबंद नदी पुलावर घडली.यामध्ये अण्णा पारधी वय ५० वर्षे असे मृतकाचे नाव आहे तर राष्ट्रपाल ठाकरे वय ५० वर्षे,राध्येश्याम ढोरे व्य ४४ वर्षे असे गंभीर जखमी झालेल्यांची नावे आहेत.
लाखांदूर येथील शेतकरी राष्ट्रपाल ठाकरे यांनी आपल्या शेतातील कडधान्य बाजार समिती येथे नेण्याकरिता आपल्या ट्रॅक्टरमध्ये भरून सहकारी अण्णा पारधी व राध्येश्याम ढोरे यांच्या सोबत ट्रॅक्टरवर निघाले होते. लाखांदूर-पवनी मार्गावरिल चुलबंद नदीवरील पुलावरुन समोरून येणाऱ्या भरधाव ट्रकने मार्ग दिला नसल्याने ट्रॅक्टर चालकाने आपला बचाव करण्यासाठी साईडला घेताना ट्रॅक्टर सरळ ३० फुट पुलावरुन नदीमध्ये खाली कोसळला.यात अण्णा पारधी यांचा जागीच मृत्यु झाला असून राष्ट्रपाल ठाकरे यांचा पाय मोडला असून राध्येश्याम ढोरे हे ही गंभीर जखमी झाले.घटनास्थळी बघ्यांची मोठ्या प्रमाणात गर्दी झाली व लगेच जखमींना उपचारासाठी लाखांदूर ग्रामीण रुग्णालयात नेण्यात आले.सदर घटनेचा तपास पोलीस प्रशासन करीत आहे.
