उद्रेक न्युज वृत्त
ब्रम्हपुरी(चंद्रपूर) :- ब्रम्हपुरी शहराच्या ब्रम्हपुरी-नागभीड महामार्गालगत असलेल्या एका बारचे शटर तोडून अज्ञात आरोपींनी रोकड लंपास केली.ही घटना तीन दिवसांपूर्वी उघडकीस आली.बार मालकाच्या तक्रारीवरून पोलिसांनी अज्ञात आरोपीविरुद्ध गुन्हा दाखल केला आहे.ब्रम्हपुरी येथील चिलआऊट बारच्या मालकाने नेहमीप्रमाणे दि.२३ मे च्या रात्री ११:३० वाजता बार बंद करून बार मालक व मॅनेजर घरी निघून गेले.दुसऱ्या दिवशी मालकाला बाहेरगावी जायचे असल्याने त्याने २४ हजार रुपये रोख बारमध्येच ठेवली.दुसऱ्या दिवशी मॅनेजरला रोकड बँकेत जमा करण्यास सांगितले.दुसऱ्या दिवशी सकाळी मॅनेजर बार उघडण्यासाठी आले असता बारचे शटर वाकविल्याचे त्यांना दिसले.लगेच याची माहिती बारमालकाला देण्यात आली.त्यानंतर ब्रम्हपुरी पोलिस ठाण्यात तक्रार दाखल करण्यात आली. पोलिसांनी बार मालक भूषण मुकेश रामटेके यांच्या तक्रारीवरून अज्ञात आरोपींविरुद्ध गुन्हा दाखल केला आहे.पुढील तपास ब्रम्हपुरी पोलिस करीत आहेत.
बारच्या खालील भागात एक हॉटेल आहे.घटनेच्या दिवशी साधारण एक वाजता हॉटेल बंद झाले. त्यानंतर दीड वाजताच्या सुमारास दोन चोरटे दुचाकीने आले.दुचाकी ठेवली, व पायऱ्यांनी वर चढले.हे दृश्य बाहेरील सीसीटीव्ही कॅमेऱ्यात कैद झाले.शटर लोखंडी रॉडने वाकवून दोघे आत शिरले.यावेळी दोन्ही चोरट्यांनी तोंडाला कापडाने झाकले होते.ते थेट लॉकरजवळ गेले.लॉकर मधील रोख व बाजूला असलेल्या दारूच्या बॉटल त्यांनी बॅगेत टाकल्या.हे दृश्य आतील कॅमेऱ्यात कैद झाले.सीसीटीव्ही फुटेज समाजमाध्यमांवर व्हायरल झाले आहे.अगदी वर्दळीच्या व मुख्य महामार्गालगत ही चोरी झाली आहे.
