चक्क शहरालगत वाघाचे दर्शन; वाघ जेरबंद..!

गोंदिया :-मध्यरात्रीच्या सुमारास एका पट्टेदार वाघाचे दर्शन झाल्याने परिसरातील नागरिकांची काहीकाळ तारांबळ उडून परिसरात भीतीचे वातावरण निर्माण झाले होते.लागलीच वन विभागास माहिती देत वाघाला जेरबंद करण्यात आले.सदरची घटना शनिवारीच्या मध्यरात्री गोंदिया शहराच्या फुलचूर परिसरातील जिल्हाधिकारी कार्यालयाच्या मागील भागात उघडकीस आली.

गोंदिया जिल्हाधिकारी कार्यालयाच्या मागील भागात  झुडपी जंगल असून परिसर शहराबाहेर नाल्यालगत लागून आहे.याच परिसरात जिल्हाधिकारी,जिल्हा पोलिस अधीक्षक तसेच अधिकारी व कर्मचाऱ्यांची वसाहत आहे.काल शनिवारी मध्यरात्रीच्या सुमारास काही नागरिकांना वसाहतीस लागून असलेल्या झुडपी जंगल परिसरात एक पट्टेदार वाघ फिरतांना दिसून आला. सदरची माहिती परिसरातील नागरिकांना होताच बघ्यांनी मोठी गर्दी केली होती.त्यानंतर याबाबतची माहिती वन विभाग व पोलीस प्रशासनास मिळताच घटनास्थळी दाखल होत वन विभागाचे रेस्क्यू पथकास पाचारण करण्यात आले.रेस्क्यू पथकाने काही तासांतच वाघाला बेशुद्ध करून जेरबंद केल्याने परिसरातील नागरिक भयमुक्त झाले.