चक्क वाळू डेपोच्या घाटावरच डल्ला..! आरमोरीच्या देऊळगाव व डोंगरसावंगी रेतीघाटावर छापा; दीड कोटी रुपयांचा मुद्देमाल जप्त.. – चार आरोपींना १४ दिवसांची न्यायालयीन कोठडी; मुख्य सूत्रधार फरार..

गडचिरोली जिल्हाधिकारी अविश्यांत पंडा यांनी ६ मार्च २०२५ रोजी जिल्ह्यात ६ खनिज डेपो कार्यान्वित केले असून या ६ खनिज डेपो पैकी आरमोरी तालुक्यातील देऊळगाव वाळू डेपोचा समावेश आहे. त्यातच आरमोरी पोलिसांनी केलेल्या कारवाईत चक्क देऊळगाव वाळू डेपोच्या घाटातून अवैध उत्खनन करून डल्ला मारण्याचा प्रकार उघडकीस आल्याने यावर गडचिरोली जिल्हाधिकारी काय ॲक्शन घेतात,हे पाहणे आता महत्वाचे आहे.

गडचिरोली जिल्ह्यात एकूण सहा डेपो कार्यान्वित झाल्याने अवैध उत्खनन प्रकरणी तक्रारी वाढू लागल्या आणि सरळ जिल्हाधिकाऱ्यांना तक्रार केली जायची.त्यामुळे जिल्हाधिकारी अविश्यांत पंडा यांनी वाळू डेपो यावर नियंत्रण ठेवण्याची जबाबदारी संबंधित उपविभागीय अधिकारी व तहसीलदार यांच्यावर सोपविली होती.जिल्ह्यात कोठेही अवैध उत्खनन होऊ नये,यासाठी सर्व तहसीलदार व उपविभागीय अधिकाऱ्यांना स्पष्ट सूचना दिल्या होत्या.तसेच अवैध उत्खनन अथवा वाहतूक आढळल्यास कठोर दंडात्मक कारवाई करण्यात येईल,असाही इशारा जिल्हा प्रशासनाने दिला होता.मात्र,अधिकाऱ्यांनी जिल्हाधिकाऱ्यांच्या निर्देशाला केराची टोपली दाखवली असल्याचे दिसून येते.

यापूर्वीही १४ मार्च २०२३ च्या मध्यरात्री आरमोरी तालुक्यातीलच डोंगरतमाशी येथील खोब्रागडी नदीच्या पात्रातून मोठ्या प्रमाणावर रेतीचा अवैध उपसा आणि वाहतूक होत असतांना पोलीस प्रशासनानेच मोठी कारवाई केली होती.अश्यातच आताही १० जून २०२५ च्या मध्यरात्री पोलीस प्रशासनानेच कारवाई केली आहे.महत्वाचे म्हणजे,अवैध वाळू उत्खनन होत असतांना तहसीलदार,मंडळ अधिकारी व संबंधित साजाचे तलाठी यांना याबाबत काहीही माहिती नाही काय? शासनाची एवढी मोठी चोरी होत असतांना फक्त पोलीस प्रशासनासच माहिती पडते काय?मूंग गिळून गप्प राहणाऱ्या अधिकारी,कर्मचाऱ्यांवर सर्वप्रथम कारवाई व्हायला पाहिजे.त्यातच अवैध वाळू उत्खनन व वाहतूक प्रकरणी जिल्ह्यात एकाही महसूल विभागाच्या अधिकारी,कर्मचाऱ्यांवर कारवाई झाली नसल्याने असे प्रकार घडू लागलेत.त्यातच पोलिसांच्या वतीने केवळ आरमोरी तालुक्यातच कारवाई होतांना दिसून येत आहे.इतर तालुक्यातील पोलीस प्रशासन निद्रावस्थेत गेले की काय? असाही प्रश्न निर्माण झाला आहे.देसाईगंज तालुक्याच्या कोंढाळा येथील मेंढा घाटात कोट्यवधी रुपयांचा अवैध वाळू उपसा सुरू असतांना कारवाई शून्य.