घोर कलियुग… ५ लाखाची लाच प्रकरणी आरोपी न्यायाधीशाची न्यायालयात धाव..! – न्यायालयाने जामीन अर्ज फेटाळला..

सदर प्रकरणातील तक्रारदार २४ वर्षीय युवती पुणे येथील आहे.या युवतीने तक्रारीत म्हटले आहे की, आपल्या वडिलांना सातारा शहर पोलिसांनी फसवणुकीच्या गुन्ह्यात अटक केली आहे सध्या ते कारागृहात आहेत.वडिलांना जामीन मिळावा; यासाठी आपण सातारा जिल्हा न्यायालयात जामिनासाठी अर्ज केला.याबाबतची सुनावणी जिल्हा सत्र न्यायालय क्रमांक- ३ चे न्यायाधीश धनंजय निकम यांच्यापुढे सुरू आहे.दिनांक-२९ नोव्हेंबर रोजी संशयित आनंद खरात (सुरुवातीला त्याने सम्राट जाधव असे नाव सांगितले) हा साताऱ्यातून आल्याचे सांगितले.तसेच तुमच्या वडिलांना अटक असलेल्या प्रकरणात जामिनासाठी मदत करणार आहे; असे सांगितले.

दिनांक-३० नोव्हेंबर रोजी संशयित आनंद खरात याने तक्रारदार युवतीच्या मोबाईलवर फोन करून वडिलांचा जामीन करायचा असेल तर ५ लाख रुपयांचा प्रोटोकॉल करावा लागेल,असे सांगितले. पैशाची मागणी झाल्याने आपण दिनांक-२ डिसेंबर रोजी लाचलुचपत प्रतिबंधक विभाग (एसीबी) पुणे येथे तक्रार केली.पुणे ‘एसीबी’ने तक्रार घेतल्यानंतर दिनांक- ३ डिसेंबर रोजी मी खरात यास भेटले.पुणे ‘एसीबी’ने या तक्रारीची पडताळणी केली असता, आनंद खरात व किशोर खरात हे दोघे जामीन अर्जाची पुढील सुनावणी १० डिसेंबर असल्याचे सांगताना आढळले.तसेच न्यायाधीशांची कोर्टात भेट घालून देतो,त्यावेळी ‘एमएसईबी’ हा कोडवर्ड वापरणार असल्याचे त्यांनी सांगितले.दिनांक-९ डिसेंबर रोजी कोर्टाचे कामकाज संपल्यानंतर न्यायाधीशांची भेट घालून देतो,असे खरात या संशयितांनी सांगितले. सायंकाळी आपण व ‘एसीबी’ पुणे येथील शासकीय पंच एकत्र असतांना एक कार (एम.एच.१६ बीएच ४४९९) आली.त्यामध्ये आनंद खरात व किशोर खरात होते.आपल्याला व पंचांना कारमध्ये बसण्यास सांगितले.चौघांची चर्चा सुरू असतांना आणखी एक कार (एम.एच.१० बीए ९४१४) आली.त्या कारमध्ये न्यायाधीश धनंजय निकम होते.यानंतर आनंद खरात यांच्यासह मी न्यायाधीशांच्या कारमध्ये बसले.तेथे ‘एमएसईबी’ या कोडवर्डवर ते दोघे बोलू लागले. प्राथमिक चर्चेनंतर न्यायाधीशांच्या कारमधून बाहेर पडलो.लाचेची रक्कम दिनांक-१० डिसेंबर रोजी घेणार असल्याचे स्पष्ट झाले.यामुळे पुणे ‘एसीबी’ विभागाने लाचेच्या रकमेवर अँथ्रासीन पावडर लावली. संशयिताचा फोन आल्यानंतर लाचेची रक्कम घेण्यासाठी साताऱ्यातील हॉटेलमध्ये बोलावले. हॉटेलचे लोकेशनही खरातला पाठवले.लाचेची रक्कम घेण्यासाठी दोन्ही खरातसह आणखी एक युवक आला.यावेळी आपल्याशी बोलत असतांना तिघा संशयितांना शंका आली.यामुळे त्यांनी हॉटेलमधून धूम ठोकली.

न्यायाधीश धनंजय निकम यांच्याविरुद्ध सातारा शहर पोलिस ठाण्यात लाचप्रकरणी गुन्हा दाखल झाल्यानंतर तक्रारदार युवतीने त्यांच्या कारच्या क्रमांकाचाही उल्लेख केला आहे.संबंधित कार न्यायाधीश धनंजय निकम यांच्याच नावावर असल्याचे समोर आले असून ते मूळचे सांगलीचे आहेत.