घरकुलाचा शेवटचा हफ्ता बाकी; कंत्राटी अभियंत्याने केली लाचेची मागणी अन् अडकला जाळ्यात..- आजची घटना…

गोंदिया :-जिल्ह्यातील अर्जुनी-मोरगाव येथील पंचायत समितीमधील कंत्राटी अभियंत्याला ७ हजाराची लाच घेताना लाचलुचपत विभागाने आज, गुरूवार दिनांक-१२ सप्टेंबरला रंगेहाथ अटक केली. अनिल धर्मराज मेश्राम असे लाचखोर कंत्राटी अभियंत्याचे नाव आहे.राज्य शासनाच्या यशवंतराव चव्हाण मुक्त वसाहत योजनेअंतर्गत २०२३-२४ या कालावधीत ग्रामपंचायत मोरगाव येथील लाभार्थ्याला घरकुल मंजूर होवून १ लाख ३१ हजार रुपये अनुदान मंजूर झाले.मंजूर झालेल्या घरकुलाची प्रशासकीय मंजुरी घेऊन लाभार्थ्यांनी बांधकाम केले.दरम्यान,लाभार्थ्याने शेवटच्या देयकाची मागणी केली.मात्र,कंत्राटी अभियंता धर्मराज मेश्राम याने देयकाच्या धनादेशावर स्वाक्षरी करण्याच्या नावावर लाभार्थ्याकडून १० हजार रुपयांच्या लाचेची मागणी केली.मात्र,लाभार्थ्याला लाच देण्याची मुळीच इच्छा नसल्याने त्यांनी लाचलुचपत प्रतिबंधक विभाग गोंदिया येथे तक्रार दाखल केली.त्यानंतर लाचलुचपत विभागाच्या पथकाने आज,गुरुवारी पंचायत समिती कार्यालयात सापळा रचला व कंत्राटी अभियंत्याला तडजोडीअंती लाभार्थ्याकडून सात हजार रुपयांची लाच घेताना रंगेहाथ अटक केली.