उद्रेक न्युज वृत्त
मुख्य संपादक/सत्यवान रामटेके
कोंढाळा(गडचिरोली) :- देसाईगंज तालुक्याच्या कोंढाळा गावापासून दोन किलोमिटर अंतरावर रवी मार्गे असलेल्या साई मंदिर परिसरात,बारसागडी बोडी परिसरात तसेच काही शेतकरी बांधवांच्या शेत बांधा नाजिक आज सकाळी ७ ते ८ वाजेच्या सुमारास वाघ व वाघिणीच्या पगमार्कचे दर्शन झाल्याने गावातील शेतकरी बांधव व नागरिकांनी सतर्कता बाळगून मानवी व वन्यजीव संघर्ष टाळण्याकरिता सहकार्य करावे; असे आवाहन संयुक्त वन व्यवस्थापन समितीचे अध्यक्ष नितीन राऊत यांनी केले आहे.
सध्याच्या घडीला गडचिरोली जिल्ह्याच्या देसाईगंज, आरमोरी व काही तालुक्यात वाघ,वाघीण व इतर हिंस्त्र प्राण्यांनी धुमाकूळ घातला आहे.त्यानुसार मोठ्या प्रमाणावर जीवितहानी तसेच शेत पिकांचे नुकसान होऊन वित्तहानी झाली असल्याचे दिसून येते.हल्ली शेतकरी बांधवांच्या धान कापणीचा हंगाम सुरू झाला आहे.त्यामुळे शेतातील पाणी काढण्यासाठी वा इतर कामांकरिता शेतकरी शेत बांधावर सकाळच्या सुमारास वा इतर वेळेस जात असतात.अशातच आज दिनांक- २६ ऑक्टोंबर २०२३ रोजी कोंढाळा-रवी मार्गे परिसरात वाघ व वाघिणीचे पगमार्क आढळून आल्याची माहिती कोंढाळा संयुक्त वन व्यवस्थापन समितीचे अध्यक्ष नितीन राऊत यांना मिळताच; त्यांनी लगेच याबाबत गावातील महिला वनरक्षक सेलोट यांना माहिती दिली.माहिती देताच लगेच वनरक्षक सेलोट यांनी गावातील लाऊड स्पीकरच्या माध्यमातून ग्रामस्थांना सूचना दिल्या व घटनास्थळी दाखल होऊन शोधमोहीम राबविण्यात येत आहे.परिसरात पगमार्क आढळून आल्याने जीवितहानी होण्याची शक्यता नाकारता येणार नाही; त्यासाठी नागिकांनी सतर्कता बाळगून आजच्या दिवस शेत बांधावर जाऊ नये; तसेच मानवी व वन्यजीव संघर्ष टाळण्याकरिता सहकार्य करावे; असे आवाहन संयुक्त वन व्यवस्थापन समितीचे अध्यक्ष नितीन राऊत यांनी केले आहे.
