कोंढाळा येथील जावयाचा सावंगी जवळ अपघात; घटनास्थळीच मृत्यू..

देसाईगंज(गडचिरोली):-आपल्या स्वगावाहून  माहेरी गेलेल्या पत्नीला आणण्यासाठी दुचाकीने जात असतांना वाटेतच लाखांदूर-देसाईगंज(वडसा)राष्ट्रीय महामार्गावरील सावंगी जवळ दुचाकीला ट्रकने जोरदार धडक दिल्याने देसाईगंज तालुक्याच्या कोंढाळा येथील ४० वर्षीय जावयाचा घटनास्थळीच मृत्यू झाल्याची घटना काल,मंगळवार २२ एप्रिल रोजी सकाळच्या सुमारास घडली.योगेश ज्ञानेश्वर पारधी रा.करांडला, ता.लाखांदुर, जि.भंडारा असे अपघातात मृत पावलेल्या व्यक्तीचे नाव आहे.योगेश पारधी हे कोंढाळा येथील हिरामण बुराडे यांचे जावई होते.

माहितीनुसार,योगेश पारधी हे दुचाकी क्रमांक- एमएच-३६ डी ६२४० ने करांडला येथुन कोंढाळा येथे जाण्यास निघाले होते.योगेश पारधी यांची पत्नी कोंढाळा येथील हिरामण बुराडे यांची मुलगी असून

सोमवारी २१ एप्रिल रोजी ती माहेरी कोंढाळा येथे आली होती.त्यामुळे योगेश पारधी हे पत्नीला आणण्यासाठी दुचाकीने कोंढाळा येथे जात असतांना लाखांदूर-देसाईगंज(वडसा)राष्ट्रीय महामार्गावरील सावंगी जवळ देसाईगंज वरून लाखांदूरकडे भरधाव वेगाने जाणाऱ्या ट्रक क्रमांक-एमएच ३० एबी २४२८ ने योगेश पारधी यांच्या दुचाकीला जोरदार धडक दिली.यात योगेश पारधी हे घटनास्थळीच गतप्राण झाले.धडक इतकी जोरदार होती की,दुचाकीच्या समोरील भागाचा अक्षरशः चेंदामेंदा झाला होता.सदर अपघाताची माहिती मार्गावरील प्रवाशांनी देसाईगंज पोलिसांना दिली.पोलीसांनी घटनास्थळ गाठून पळून जाणाऱ्या वाहनाचा पाठलाग करून लाखांदूर येथे पकडला.ट्रक चालक शंकर भास्कर खेडकर रा.नेरी,ता.चिमुर,जि.चंद्रपुर यांस देसाईगंज पोलिसांनी ताब्यात घेत गुन्हा दाखल केला. शवविच्छेदनानंतर मृतकाचे प्रेत नातेवाईकांच्या ताब्यात देण्यात आले. घटनेचा पुढील तपास देसाईगंज पोलीस ठाण्याचे ठाणेदार अजय जगताप यांच्या मार्गदर्शनाखाली पोलीस प्रशासन करीत आहे.