आमदार रामदास मसरामांच्या प्रयत्नातून कोरची येथे होणार नवे शासकीय विश्रामगृह.. – विश्रामगृहास २ कोटी ५७ लाखाचा निधी मंजूर..

गडचिरोली :-जिल्ह्याच्या अतिदुर्गम भागात वसलेल्या कोरची तालुक्याच्या सर्वांगीण विकासासाठी आरमोरी विधानसभा क्षेत्राचे आमदार रामदास मसराम सातत्याने पाठपुरावा करत असून त्यांच्या ठोस प्रयत्नांना मोठे यश मिळाले आहे.आमदार मसराम यांच्या प्रयत्नातून कोरची येथे अत्याधुनिक सोयीसुविधांनी सुसज्ज अशा नवीन शासकीय विश्रामगृहाच्या बांधकामासाठी शासनाने तब्बल २ कोटी ५७ लाख रुपयांचा निधी मंजूर केला आहे.कोरची तालुका हा आदिवासी व दुर्गम भागात येत असल्याने प्रशासकीय अधिकारी,लोकप्रतिनिधी तसेच विविध विभागांचे कर्मचारी यांना वास्तव्याच्या सुविधांचा अभाव जाणवत होता.ही बाब लक्षात घेता आमदार रामदास मसराम यांनी सातत्याने शासन दरबारी पाठपुरावा केला.त्यांच्या प्रयत्नांमुळेच हा महत्त्वाचा विकासात्मक प्रस्ताव मंजूर झाला आहे.

या विश्रामगृहामुळे तालुक्यातील प्रशासकीय कामकाज अधिक गतिमान होणार असून नागरिकांच्या प्रश्नांना वेळेत न्याय मिळण्यास मदत होणार आहे.त्याचबरोबर, बाहेरून येणाऱ्या अधिकाऱ्यांना सोयीस्कर व्यवस्था उपलब्ध होणार असल्याने कोरची तालुक्याच्या विकासाला नवी चालना मिळणार आहे.या निधी मंजुरीबद्दल कोरची तालुक्यातील नागरिक,सामाजिक कार्यकर्ते व विविध संघटनांनी आमदार रामदास मसराम यांचे अभिनंदन करून आभार व्यक्त केले आहे. विकासासाठी कटिबद्ध असलेले आमदार रामदास मसराम यांचे नेतृत्व कोरची तालुक्यासाठी निश्चितच लाभदायक ठरत असल्याची भावना नागरिकांमधून व्यक्त होत आहे.