आता वाहतूक पोलिसांना दिलेल्या मशीनद्वारेच करावे लागणार ई-चलान..

नागपूर :-एखाद्या मार्गावरून वाहनाने जात असतांना वाहतूक पोलीस दिसले की,अनेक वाहनधारकांच्या मनात धडकी भरत असते.त्याचे कारणही तसेच आहे.कुणाकडे लायसेन्स असते तर इन्शुरन्स नसते,एक ना एक कमी असल्याने वाहतूक पोलीस वाहन थांबवतात व चलान फाडून आर्थिक भुर्दंड बसवीत असतात.अश्यातच काहीजण झंझट नकोच,या उद्देशाने सुसाट वाहने पळवून वाहतूक पोलिसांच्या हातावर तुरी देऊन पळ काढतात.त्यामुळे एखादेवेळी वाहतूक पोलीस कर्मचारी स्वतःच्या खासगी मोबाईलने वाहनांचे फोटो काढतात व ई-चलान करतांना दिसून येतात.मात्र,आता कोणत्याही वाहतूक पोलिसाने झाडामागे किंवा कोपऱ्यात उभे राहून स्वतःच्या खासगी मोबाईलने वाहनांचे फोटो काढले आणि ई-चलान केले तर अश्यांवर कारवाई करण्यात येईल,असे पोलिस आयुक्त डॉ.रवींद्रकुमार सिंगल यांनी स्पष्ट केले आहे.त्यानुसार पोलिसांना दिलेल्या मशीनद्वारेच त्यांना ई-चलान करता येणार आहे.काही वाहतूक पोलिस नियम तोडणाऱ्यांचे मोबाईलने फोटो काढत असल्याचे दिसून आले आहे.अतिरिक्त पोलिस महासंचालकांनी याअगोदरच असे करू नये,असे दिशानिर्देश जारी केले होते.आता परत याबाबत अतिरिक्त पोलिस महासंचालक (वाहतूक) प्रवीण साळुंखे यांनी सूचना जारी केल्या आहेत. काही वाहतूक पोलिस वैयक्तिक मोबाईल फोन वापरून वाहनांचे फोटो काढायचे व ई-चलान सिस्टीममध्ये अपलोड करायचे.असा प्रकार नियमांचे उल्लंघन करण्याचा आहे.वरिष्ठ पातळीवरून निर्देश आल्यावर आम्ही सर्वांना याचे काटेकोरपणे पालन करण्यास सांगितले आहे.मात्र, तरीदेखील कुणी वाहतूक पोलिस असे करत असेल तर त्वरित अधिकाऱ्यांना कळवावे,असे आवाहन करण्यात आले आहे.