अल्पवयीन मुलीचे विनयभंग करून वर्षभरापासून फरार आरोपी अटकेत..

गोंदिया :-अल्पवयीन मुलीचे विनयभंग करून मागील एक वर्षापासून सराईत गुन्हेगार असलेल्या फरार आरोपीच्या रावणवाडी पोलिसांनी मुसक्या आवळल्या. सतीश जयलाल ठाकरे वय ४५ वर्षे,रा.बनाथर ता.गोंदिया असे अटकेतील आरोपीचे नाव आहे.

प्रकरण असे की,आरोपी सतीश ठाकरे याने अल्पवयीन मुलीचा विनयभंग केल्याप्रकरणी रावणवाडी पोलिसांनी ९ जानेवारी २०२४ रोजी गुन्हा दाखल केला होता.घटना घडताच सतीश ठाकरे घटनेच्या दिवसापासून पळून गेला होता.त्याने शक्कल लढवून स्वतःजवळ मोबाईल न ठेवता इतरत्र भटकत होता.त्यातच त्याचा ठाव ठिकाणा कुणालाही माहीत नसल्याने पोलिसांपुढे त्याचे शोध घेण्याचे मोठे आव्हान उभे होते.अशातच आरोपी सतीश ठाकरे याच्यावर पोलीस ठाण्यात विविध गुन्हे दाखल होते.सराईत गुन्हेगार असलेल्या सतीश बाबत इतर पोलीस ठाण्यात फरार असल्याची माहिती प्रसारित करण्यात आली.पोलिसांना वारंवार चकमा देत असतांना त्याच्याविरोधात न्यायालयात दोषारोपपत्र दाखल करण्यात आले होते.वर्षभरापासून फरार असल्याने आरोपी हा रावणवाडी पोलिस ठाण्याच्या हद्दीत वावरत असल्याची गोपनीय माहिती पोलिसांना मिळाली.पोलिस हवालदार अरविंद चौधरी व पोलिस पथकाने ताबडतोब शोधकार्य अवलंबिले आणि आरोपीला रजेगाव परिसरातून ताब्यात घेत अटक केली.आरोपी सतीश ठाकरे याला पोलिसांनी न्यायालयात हजर केले असता,न्यायालयाने त्याला न्यायालयीन कोठडी सुनावली.त्यानुसार,त्याची भंडारा कारागृहात रवानगी करण्यात आली आहे.सदरची कारवाई पोलिस अधीक्षक गोरख भामरे,अप्पर पोलिस अधीक्षक नित्यानंद झा यांच्या निर्देशानुसार उपविभागीय पोलिस अधिकारी रोहिणी बनकर यांच्या मार्गदर्शनाखाली रावणवाडीचे पोलिस निरीक्षक चंद्रकांत काळे,सहायक पोलिस निरीक्षक सुनील अंबुरे,पोलिस हवालदार अरविंद चौधरी,पोलिस शिपाई आशीष वैद्य यांनी केली.