अन् चक्क माजी सरपंचानेच खेमराज नेवारे यांच्या पुढे वाचला समस्यांचा पाढा…

कुरखेडा(गडचिरोली):-आरमोरी विधानसभा क्षेत्राच्या कुरखेडा तालुक्यातील वडेगाव गावातील माजी सरपंच तथा ग्रामपंचायत सदस्य संजय कोरेटी यांनी सामाजिक कार्यकर्ते खेमराज नेवारे यांच्यापुढे ग्रामपंचायतीतील समस्यांचा पाढा उभा करीत पदाधिकाऱ्यांकडून कसे दुर्लक्ष केले जात आहे; हे लक्षात आणून दिले.आरमोरी विधानसभा क्षेत्राचे इच्छुक युवा उमेदवार खेमराज नेवारे यांनी वडेगाव व परिसरातील गावांना सदिच्छा भेट दिली असता गावातील समस्यांविषयी नागरिकांनी प्रश्न उपस्थित केले.

ग्रामपंचायत पदाधिकारी गाव विकासाकडे दुर्लक्ष करीत असल्याचे चक्क माजी सरपंच यांनी सांगितले. माजी सरपंच यांच्या घरासमोरील आश्रम शाळेकडे जाणारा सिमेंट रस्ता पाईपलाईन टाकण्यासाठी खोदण्यात आला; मात्र,अजूनही सदर रस्त्याची दुरावस्था कायम आहे.जागोजागी खड्डे तयार झाले आहेत; त्यामुळे गावकऱ्यांना नाहक त्रास सहन करावा लागत आहे.त्याचप्रमाणे ग्रामपंचायत अंतर्गत येणाऱ्या आंजणटोला येथे पाण्याची टाकी तयार करण्यात आली असून त्यात मुबलक प्रमाणात पाणीपुरवठा होत नाही.अशा परिस्थितीत ऐन पावसाळ्यात सुद्धा पाणी टंचाईचा सामना समस्त गावकऱ्यांना सहन करावा लागतो आहे.यातून सुटका कोण करेल यासारखे अनेक विकासात्मक मूलभूत प्रश्न गावकऱ्यांसमोर निर्माण झाले असून अजूनही ते प्रश्न अनुत्तरीत आहेत.खेमराज नेवारे यांनी गावातील संपूर्ण समस्या जाणून घेत ग्रामविकास अधिकारी, पंचायत समिती,कुरखेडा यांच्याशी निवेदनाद्वारे पत्रव्यवहार करून मूलभूत समस्या सोडविण्यासाठी प्रयत्न करणार असा निर्धार केला.याप्रसंगी खेमराज नेवारे यांच्यासोबत वैभव परशुरामकर,जितेश कापगते, नरेश वासनिक व ग्रामस्थ उपस्थित होते.